Бежиз “Болалар” гуруҳи афсонавий дея таърифланмайди. Боиси гуруҳ қисқа вақтда машҳурликка эришган ва уч ойда “Халқлар дўстлиги “санъат саройида концерт берган. Улар iTunis да альбом чиқарган илк ўрта осиёлик гуруҳ ҳисобланади. Хўш, Тоҳир Содиқов қандай қилиб санъатга меҳр қўйди ва бу борада уни кимлар қўллаб -қувватлади?
Тоҳир Содиқовнинг отаси Баҳромжон Содиқов заҳирадаги офицер ва учувчи бўлган. Аммо у фарзандлари ёшлигида ҳаётдан кўз юмган. Онаси эса қишлоқ хўжалиги бўйича таҳсил олган, аммо анча йил уй бекаси бўлган. Турмуш ўртоғи вафот этиб, рўзғор юки елкасига тушгач, заводга ишга кирган. Хонанда болалигини жуда яхши эслайди. У мактабдаги энг шўх ўқувчилардан бири бўлган.
— Жуда шўх бўлганман, аммо 10 йил ўқиб бирор марта чорагимга уч баҳо қўйишмаган. Тўрт баҳоларим ҳам бир-иккита бўларди холос. Китоб ўқиш жон-у дилим эдим. Мен ўзбек синфда опаларим эса рус синфда ўқишган. Аммо рус тилида улардан кам билмасдим. Мактабдош дўстларимиз билан 1989 йили гуруҳ ташкил қилиш ва қўшиқ айтиш фикри пайдо бўлган. Жавоҳир Зокиров поччаси билан гаплашиб кўришини айтган. У пайтда Наргиз Зокированинг турмуш ўртоғи Руслан Шарипов эди, — дейди Тоҳир Содиқов.
Жавоҳир Зокиров сабаб Тоҳир Содиқов Руслан Шарипов билан танишган. У ўз даврининг энг ҳит қўшиқларини ёзадиган бастакори эди. “Болалар” гуруҳининг илк таркибида Баҳодир Пўлатов, Ҳусан Содиқов (Тоҳир Содиқовнинг акаси), Жавоҳир Зокиров, Наргиза Зокирова, Тофик Мордухаев, Тоир Одилов ва Тоҳир Содиқовлар бўлган.
— У йиллари “Лосковий май” гуруҳи ижоди гуллаган йиллар эди. Биз ҳам барча ёшлар сингари уларга ҳавас қилардик, баъзан ўхшашга интилардик. Гуруҳга ном топиш керак бўлганида ҳам “Жозибор май” деб номламоқчи бўлганмиз. Бир куни Руслан Шариповнинг офисига бориб, шу борада гаплашиб қолдик. У ўзбек қўшиқчилари билан ишласа ҳам бу тилни унча яхши билмасди. Ёшимиз деярли тенг бўлса ҳам “Пацани” деб мурожаат қиларди. Шунда Баҳодир Пўлатов “Болалар” деб қўйсакчи деб таклиф киритди. Ном барчага маъқул бўлганидан кейин шундай номлашга қарор қилдик, — дейди Тоҳир Содиқов.
Гуруҳ илк яккахон концерт дастурини 1990 йил 23 февралда “Алпомиш” спорт саройида тақдим этган. Январь ойида эса “Эсингдами сени” номли илк альбоми тақдим этилган эди. Орадан уч ой вақт ўтмасдан мухлислардан концерт бериш борасида жиддий таклифлар тушган ва улар “Халқлар дўстлиги” санъат саройида концерт беришган.
— Ўша йилларда концерт ташкилотчилари бўлиб ишлаган инсонлар “Болалар”ни жуда яхши эслашади. Талаб юқори бўлгани учун битта стадионда икки-уч маротаба концерт берардик. Жамоамиз катта эди, унинг устига дискотека руҳиятини яратиш учун чироқлар ва овоз кучайтирувчи ускуналарни ҳам ўзимиз билан олиб юрардик. Энди Тошкентга қайтамиз деганимизда яна қайсидир вилоят ёки қўшни республикадан таклиф тушарди. Аммо жуда қийин йиллар эди. Бир машина пулингиз бўлса ҳам дўконларда сотиб олишга нарса бўлмасди. Гостролларда овқатдан кўп қийналардик, — дейди Тоҳир Содиқов.
Тоҳир Содиқовнинг хорижга илк сафари 1995 йили бўлган. У илк марта АҚШга борганида кўзларига ишонмагани ва мусиқий дўконда бўлган воқеалар ҳақида сўзлаб берди.
— АҚШга илк марта 1995 йили борганман. У йилларга бориб кассеталар йўқолиб, дисклар пайдо бўлаётган йиллари эди. “Болалар” гуруҳи Ўзбекистондан биринчилардан бўлиб альбомини диск кўринишида чиқарган. Яширмайман, ўшанда АҚШдаги баланд биноларни кўриб оғзим очилиб қолганди. Мусиқий альбомлар дўконига борганмиз. Мамлакат ҳарфини танласангиз, у ердаги машҳур қўшиқчиларнинг номи чиқар экан. Ўзбекистонлик қўшиқчилардан Турғун Алиматов, Муножат Йўлчиева ва “Ялла” гуруҳининг альбомлари сотилар экан. Сотувчига 10 та янги альбомимни қолдириб, картатекага киритиб қўйишини сўрагандим, — дейди Тоҳир Содиқов.
Тоҳир Содиқовга “Ҳаётингиздаги энг қувончли кун қайси” деб савол беришганида “Уйланган ва илк бор ота бўлган куним” деб жавоб беради. Хўш, у аёли Шаҳноза билан қандай танишган?
— Бир куни Тошкентдаги Қорасув даҳаси томондан қайтаётгандик. Ёмғир ёғиб турибди, бир қиз йўлда кетаётган экан. Унга раҳмим келиб тўхтасам, “Керакмас, кетаверинг” деб ноз қилган. Эртаси куни ҳам уни йўлда кўрганман. Хуллас, кўнглим тушиб, уй телефонини сўраганман. Аммо мени ҳалигача қизиқтирадигани Шаҳноза у даҳада яшамаган, ўқимаган бўлса (кулиб). Мен билан учрашиш учун атайин йўлимдан чиққанмикан? Аёлим билан тўрт йил давомида бир-биримизни синаганмиз. Онамга совчиликка боринг десам, “Ишни аввал пишит, борсам уйдагилари йўқ деса-чи”, деган. Чунки онам жуда ғурурли инсон бўлган. Хуллас, бир-биримизни синаганимиздан кейин оила қуришни таклиф қилганман. Икки қиз ва бир ўғил фарзандни тарбияладик. Шаҳнозанинг асл касби шифокорлик, аммо фарзандлар сабаб ишламади, — дейди Тоҳир Содиқов.
Ҳар бир инсон ҳаётида тушкунлик ҳолатлари бўлади. 2000 йили “Болалар” гуруҳи таркибида кўплаб ўзгаришлар бўлган. Кўпчилик жамоа аъзолари гуруҳни тарк этган. Миш-мишларга қараганда, бу ўзгариш Тоҳир Содиқовнинг саломатлиги ёмонлашига сабаб бўлган экан.
— Тушкунлик ҳолатлари ҳар доим бўлади. Аммо гуруҳни тарк этганларнинг ҳам қарорини ҳурмат қиламан. Улар гуруҳ таркибида бўлмаса ҳам дўстлигимиз сақланиб қолган. Мен бирор нимадан сиқилсам, қўшиқ ёзиб куч оладиган инсонман. Ўша йиллари “йўқолиб” қолишимнинг сабаби автофалокатга учраганим билан боғлиқ. Оёғим жиддий жароҳатлангани учун бир йил давомида тўшакка михланиб қолганман. Аммо ўшанда ҳам қўшиқлар яратиб, оёққа турганимдан кейин унинг бир нечтасини студияда ёздирганман, — дейди Тоҳир Содиқов.
Тоҳир Содиқов ўзбек эстрадасидаги дуэтдош танлаш борасидаги энг инжиқ хонанда ҳисобланади. Ҳатто, у Cover Up лойиҳасида ғолиб бўлган ёш ижодкор билан дуэт куйлашни ҳам рад этган. Бунинг сабабини қуйидагича изоҳлайди.
— Юристим ва менежерим бор. Мен аввалдан дуэтларни шунчаки ижро этган одам эмасман. Таклиф у хонанда томонидан киритилаётган бўлса, албатта, ҳақ сўрайман. Мен билан дуэт айтиш учун 25-30 минг АҚШ доллари миқдорида гонорар тўлаши керак. Кўрсатувга борганимда кутилмаганда дуэт айтасиз деб қолишган. 34 йиллик санъаткор ёш ижрочи билан дуэт куйлаши қанчалик тўғри. Дадаси ёки канал маъмурияти пул берса бошқа гап эди, — дейди хонанда Тоҳир Содиқов.
Хонанда қандай вазиятларда ўзини ноқулай ҳис қилиши ҳақида ҳам айтиб ўтди.
— Ҳар бир инсоннинг ўз услуби бор. Масалан, менга кастюм-шим ва бўйинбоғ ёқмайди. Ўзимни ноқулай ҳис қиламан. Бўйинбоғ билан гитара чалиш ҳам ноқулай. Мен мусиқа мактабида ўқимаганман. Олий маълумотли ҳам эмасман. Саҳнада эркин куйлашим учун либосим ҳам шунга ҳамоҳанг бўлиши керак, — дейди Тоҳир Содиқов.
Изоҳ (0)