Дунёда Россия ва Украина ўртасидаги урушни очиқдан очиқ қўллаб-қувватловчи артистлар ва ижрочи гуруҳларни концерт беришларига кенг жамоатчилик кескин эътироз билдирмоқда. Кўплаб мамлакатларда уларнинг концерт беришларига чеклов қўйилган. Хусусан, Ўзбекистонда май ойида бўлиши режалаштирилган Zhara (талаффузда “Жара” — “Дарё” изоҳи) халқаро мусиқа фестивали жамоатчиликнинг кескин эътирозидан кейин қолдирилганди.
Бугун, 3 июль куни Маданият ва туризм вазирлигида бўлиб ўтган тадбирда маданият ва туризм вазири ўринбосари Баҳодир Аҳмедов кремлпараст қўшиқчиларга Ўзбекистонда концерт бериши ёки аксинча чеклов қўйилиши бўйича изоҳ берди, дея хабар бермоқда "Дарё" мухбири.
“Ҳамма нарсага чегара қўйиш мумкин. Аммо санъат — чегарасиз соҳа. Бизга санъатни эъзозлайдиган, ҳурмат қиладиган театр, эстрада йўналиши бўйича хонандалар келмоқда. Уларга қайсидир мамлакатларнинг бир-бирига бўлган муносабатига ҳеч қандай боғлиқлиги йўқ. Қайси давлатдан келаётган бўлса, санъатни ҳурмат қиламан, халққа хизмат қиламан, санъатнинг чўққисини кўрсатаман, деб келаётган бўлса ва у ҳақиқий санъаткор бўлса, Ўзбекистон ҳеч қайси санъаткорга эшикни ёпиб, тамбалаб қўйган жойи йўқ. Келяпти, санъатни намойиш қиляпти, олқишини оляпти, кетяпти”, — деди Баҳодир Аҳмедов.
Вазир ўринбосарининг таъкидлашича, концертлардан тушган маблағлар урушга йўналтирилиши ҳақидаги гаплар ҳақиқатдан йироқ.
“Ўзбекистонда санъатга тўсиқнинг ўзи йўқ. Тинч юртда яшаяпмиз. Туркий давлатларнинг TURKSOY ташкилотидан қанча санъаткорлар ташриф буюрди. Концерт қўйяпти, халқнинг олқишини оляпти. Фотокўргазмалар ўтказяпти.
Халқимиз санъацевар халқ. “Қайсидир пулни қаергадир ишлатаётган экан, буни бундай қилаётган экан”, деган фисқ-у фасод гаплардан йироқ бўлиш керак. Гапираётганнинг ўзи шу гапларни қўзғаш учун ҳаракат қилмоқда. Урушнинг куни шу концерт пулига қолибдими? Тинчлик тарафдорими, тинч юрсин.
Битта рухсатнома бериладиган бўлса, урушга тақайди, бошқа нарса бўлса, унга тақайди. Фақат яхши ниятлар билан, олий ниятлар билан ҳаракат қилиш керак. Ҳамма нарсанинг ёмонини эмас, яхши тарафини ўйлаш керак. Шу санъаткор шу ерга ўз санъатини кўрсатиш учун келибди, деб баҳо бериш керак. Иккинчи, учинчи, тўртинчи — орқада турадиган фисқ-у фасоддан йироқроқ, устунроқ бўлишимиз керак. Шунда мақсадимизга эришамиз. Мақсадимиз битта — ёшларимиз санъатга чанқоқми, интиляптими, шуни қўллаб-қувватлашимиз керак. Бизнинг сиёсатимиз шу”, — деди Баҳодир Аҳмедов.
Вазир ўринбосари қўшни мамлакатларда урушни очиқдан очиқ қўллаб-қувватловчи санъаткорларнинг концерти қолдирилишига, “Ён қўшинларни ўзининг сиёсати, ўзининг дунёси бор. Улар ўзи учун жавоб берсин, биз ўзимиз учун жавоб берамиз”, — дея изоҳ берди.
Нега ҳамма фестивални ўтказишдан бош тортмоқда?
Фестивальда ўз қўшиқлари билан иштирок этадиган хонандаларнинг аксарияти рус шоу-бизнеси вакиллари ҳисобланади. Улар орасида Григорий Лепс, Филипп Киркоров, Тимати, Олга Бузова, Сергей Лазарев каби Россиянинг Украинадаги урушини очиқдан-очиқ қўллайдиган қўшиқчилар ҳам бор. Шу сабабли мезбон мамлакат фуқаролари ижтимоий тармоқларда фестивалга қарши кенг кўламли виртуал норозилик аскиялари уюштирган. Уларнинг фикрича, россиялик санъаткорларнинг Қозоғистондаги чиқишлари республика “Украинадаги урушни қўллаб-қувватлашини” билдиради.
Изоҳ (0)