“O‘zbek Maradonasi”dan haqiqiy vatanparvargacha: O‘zbekiston milliy terma jamoasi sardorlari haqida (video)

O‘zbekiston milliy terma jamoasi CAFA Nations Cup 2023 turniri finalida Eronga imkoniyatni boy berdi. Lekin finalga qadar bosib o‘tilgan yo‘lda, terma jamoa sardori Eldor Shomurodov haqiqiy liderlik sifatlarini namoyish etdi. Umuman sardorlarda yetakchilik, katta mas’uliyat bo‘lishi lozim. Bugun O‘zbekiston terma jamoasining barcha davrlardagi sardorlarini yodga olinadi.

Mirjalol Qosimov

“O‘zbek Maradonasi” deb nom berilgan Mirjalol Qosimov faoliyatini 2006-yilda yakunlagan bo‘lsa-da, futbol muxlislari hamon uning maydondagi betakror harakatlarini qo‘msashini ta’kidlab keladi. Buni tushunish mumkin, boisi o‘tgan vaqt davomida mamlakatda bir o‘zi o‘yin taqdirini hal qila oladigan va jamoadoshlarini o‘z orqasidan yetaklaydigan o‘yinchilar yetishib chiqqani yo‘q deb aytish noto‘g‘ri bo‘lmaydi. Qosimov davrida standart vaziyatlar terma jamoaning eng katta ustun tomoni edi. Qosimov ularni shu qadar aniqlik va nafislik bilan amalga oshirar ediki, hatto darvozabonlar ham uning zarbalariga shunchaki mahliyo bo‘lib qolardi. Shuningdek, u maydon markazidan turib, butun bir o‘yinni nazorat qilib turardi. Uning zargarona uzatmalaridan so‘ng gol urishdan ko‘ra gol ura olmaslik qiyinroq edi.

Qosimov butsalarini mixga ilgach, murabbiylik faoliyatini boshladi. U qisqa vaqt mobaynida “Bunyodkor” va terma jamoani boshqarib, qoniqarli natijalarga erishdi deb aytish mumkin. Mirjalol Qosimov hozirda Olmaliqning “OKMK” jamoasiga ustozlik qilmoqda. Uning terma jamoadagi statistikasi quyidagicha bo‘lgan: 67 o‘yin, 31 gol.

Maksim Shatskix

Hozirda “Paxtakor” bosh murabbiyi bo‘lgan Shatskix O‘zbekiston milliy terma jamoasi tarixidagi eng yaxshi to‘purar edi. Yaqindagina Eldor uni ortda qoldirdi. Maksim terma jamoada 20 yoshida debyut qilib, 60 o‘yinda 34 ta gol urgan. Uning maydondagi ustun tomonlari sifatida gol sezish qobiliyati va ikkinchi qavatda yaxshi o‘ynay olishini ko‘rsatish mumkin edi. Shatskix garchi terma jamoaga uzoq vaqt davomida sardorlik qilmagan bo‘lsa-da, har doim o‘z o‘rniga ega bo‘lib kelgan. 

Server Jeparov

Server Jeparov ham uzoq yillar davomida O‘zbekiston milliy terma jamoasiga sardorlik qilgan va jamoaning eng muhim o‘yinchilaridan biri bo‘lgan. Ikki bor Osiyoning eng yaxshi futbolchisi (2008 va 2011-yillarda) deb topilgan Jeparov maydon markazida o‘yinning borishini nazorat qilardi va aqlli paslari bilan hujumchilarni qulay vaziyatlarga olib chiqardi. 

Aytarlik hech qanday (katta) natijaga erishmagan bo‘lsa-da, Jeparovning ham termadagi faoliyatini qoniqarli baholash mumkin. 

Odil Ahmedov

Odil Ahmedov terma jamoa tarixidagi eng yorqin futbolchilardan biri hisoblanadi. Ahmedov har doim maydonda fidoyiligi va o‘zini ayamasligi bilan ajralib turgan. U o‘zi maydonga tushgan o‘yinlarning hech birida shunchaki harakat qilmagan, balki haqiqiy jangchi sifatida maydonning har bir qarich yeri uchun kurashgan. Va aynan shuning uchun uni barcha muxlislar birdek qadrlagan. O‘zbekiston 2022-yilda Qatarda bo‘lib o‘tgan Jahon Chempionati yo‘llanmasini qo‘ldan chiqarganidan so‘ng Odil terma jamoadagi faoliyatini yakunladi. 

Eldor Shomurodov

Hozirda “Roma” sharafini himoya qilayotgan Eldor Shomurodov terma jamoaning yetakchi futbolchilaridan biri. 27 yoshida O‘zbekiston terma jamoasining eng yaxshi to‘purariga aylandi. 66 o‘yinda 37 ta gol. 

Shomurodov sardorligida O‘zbekiston terma jamoasi CAFA Nations Cup—2023 finaliga qadar yetib bordi. Finalda Eronga imkoniyat boy berildi.