Шавкат Мирзиёев Ёшлар куни муносабати билан табрик йўллади ва бир гуруҳ ёшларни мукофотлади

Шавкат Мирзиёев 30 июнь — Ёшлар куни муносабати билан Ўзбекистон ёшларига байрам табриги йўллаб, фаол ва ташаббускор ёш авлод вакилларидан бир гуруҳини мукофотлади.

Президентнинг байрам табригида айтилишича, бугунги кунда мактаб, коллеж, техникум ва олийгоҳларда билим олаётган, ўз шахсий ишини очиб, тадбиркорлик билан шуғулланаётган, Қуролли кучлар сафларида йигитлик бурчини шараф билан адо этаётган, ишлаб чиқариш, қурилиш, илм-фан, таълим, тиббиёт, маданият, адабиёт ва санъат, спорт соҳаларига, замонавий IT-технологиялари йўналишларига дадил кириб бораётган, катта орзу-умидлар билан яшаётган 18 миллиондан зиёд ўғил-қизлар — бебаҳо бойлик, олтин захирадир.

“Янги Ўзбекистон бунёдкори бўламан!”, “Учинчи Ренессанс пойдеворини яратишга муносиб ҳисса қўшаман!”, деган юксак мақсадлар фарзандларимиз қалбидан чуқур жой олиб, уларнинг ҳаёти ва фаолияти мазмунига айланиб бораётгани билан ҳар қанча фахрлансак, арзийди.

Навқирон авлодимизнинг ҳуқуқ ва манфаатларини таъминлаш, ўғил-қизларимизнинг билим олиши, меҳнат қилиши, ўз қобилият ва истеъдодини рўёбга чиқариши учун барча шароитларни яратиш сўнгги йилларда Ўзбекистонда давлат сиёсати даражасига кўтарилгани ва бу борада улкан ишлар амалга оширилаётгани сизларга яхши маълум, албатта.

Ўтган қисқа даврда ушбу йўналишда 100 дан ортиқ қонун ҳужжатлари қабул қилиниб, изчил амалга оширилаётгани буни яққол тасдиқлайди. Айниқса, янгиланган Конституциямизда ёш авлоднинг ҳуқуқ ва манфаатлари аниқ моддалар билан муҳрлаб қўйилгани, ҳеч шубҳасиз, бу борадаги ҳуқуқий базани янада кенгайтириш, амалий ишларимизни янги босқичга кўтариш имконини бермоқда.

Шу ўринда янги таҳрирдаги Асосий қонунимиз лойиҳасини муҳокама этиш ва умумхалқ референдуми орқали қабул қилишда ёшларимиз алоҳида фаоллик кўрсатганини миннатдорлик билан таъкидлаб ўтмоқчиман. Бу эса ўғил-қизларимизнинг Ватанимиз тақдири ва келажагига юксак дахлдорлик туйғуси билан яшаётгани, мамлакатимиздаги сиёсий-ижтимоий жараёнларга янгича руҳ ва мазмун олиб кираётганидан далолат беради.

Айни пайтда бундай фаол муносабат бутун халқимиз қатори ёшларимиз билан ҳам доимий мулоқотни йўлга қўйиб, фикр ва истакларини эшитаётганимиз, барча дастур ва режаларимизни амалга оширишда ўғил-қизларимизни кенг жалб этиб, уларга ишонч билдираётганимиз натижаси, десак, тўғри бўлади, дейилади табрикда.

Қайд этилишича, ўтган даврда ёшлар билан ишлаш бўйича мутлақо янги – вертикал бошқарув тизими яратилди. Барча маҳаллаларда ёшлар етакчиси лавозими жорий этилиб, бу вазифага ташкилотчилик қобилиятига эга, ташаббускор йигит-қизлар танлаб олинди. Маҳаллада бу тизим орқали ёшларга 100 дан ортиқ имкониятлар яратилди. “Ёшлар дафтари” тизими йўлга қўйилиб, сўнгги икки йилда 798 минг нафарга яқин ёшларга қарийб 1 триллион сўмлик ёрдамлар кўрсатилди. Жумладан, 53 минг нафар эҳтиёжманд оилага мансуб талабага ўқиш учун контракт пуллари тўлаб берилди.

Олий таълим муассасалари сони салкам уч марта кўпайиб, 210 тага, қамров даражаси эса 9 фоиздан 38 фоизга етгани замонавий илм ва касб соҳаларини эгаллашда ўғил-қизларимиз учун янги имкониятлар очмоқда. Охирги уч йилда 250 минг нафар ёшга 6 триллион сўмдан зиёд имтиёзли кредитлар ажратилди. Мамлакат бўйича 210 та “Ёшлар саноат ва тадбиркорлик зоналари” ташкил этилиб, 4 триллион сўмлик 2,5 мингта лойиҳа амалга оширилди. Натижада, ёш тадбиркорлар сони 2 карра кўпайиб, 200 мингдан ошди.

“Биз нафақат ёшларимиз, балки бутун жамиятимиз ҳаётини тубдан ўзгартиришга хизмат қилаётган ана шундай эзгу ишларимизни бундан буён ҳам изчил давом эттирамиз. Шу борада ёшларимизни ҳар томонлама қўллаб-қувватлаш, сиз, азизларнинг салоҳият ва иқтидорингизни ривожлантириш ва рўёбга чиқариш учун имконият ва шароитларни янада кенгайтирамиз.

Юртимиз ёшлари яратилаётган имкониятлардан унумли фойдаланиб, турли соҳаларда дастлабки умидбахш натижаларни қўлга киритаётгани албатта барчамизни хурсанд қилади. Ўзбекистонлик ўқувчилар ўтган йили халқаро фан олимпиадаларида 7 та олтин, 36 та кумуш ва 38 та бронза медалини қўлга киритдилар. Ёш спортчиларимиз эса халқаро мусобақаларда муваффақиятли иштирок этиб, бу йил 247 та олтин, 119 та кумуш, 110 та бронза медал соҳибига айландилар. Кейинги йилларда Ватанимиз равнақига муносиб ҳисса қўшиб келаётган ана шундай ёшларнинг 758 нафари давлат мукофотларига сазовор бўлдилар.

Албатта, биз азиз фарзандларимизнинг орзу-интилишлари, илғор ғоя ва ташаббусларини рўёбга чиқариш бўйича бошлаган ишларимизни давом эттириб, уларни янги, янада юксак босқичга олиб чиқамиз. Ишончим комил, жонажон Ватанимизга меҳр ва садоқат билан яшаётган, илм-фан ва касб-ҳунарларни пухта эгаллаб, ҳозирги мураккаб замондаги кескин рақобатга тайёр бўлиб вояга етаётган ёшларимиз ҳар қандай баланд маррани эгаллашга қодир. Сиз, азизларни бугунги ёшлик, бахт ва нафосат айёми билан яна бир бор чин дилдан табриклаб, барчангизга сиҳат-саломатлик, улкан ютуқ ва омадлар тилайман. Ҳеч қачон унутманг, ғалаба ва бахт – астойдил интилганники! Сизларнинг ютуғингиз – бу бутун эл-юртимизнинг ютуғи. Халқимиз сизларга ишонади, сизларга таянади сизлардан куч-ғайрат, руҳ ва илҳом олади. Ўз олдингизга улуғ мақсадлар қўйиб яшашдан асло чарчаманг! Янги Ўзбекистонни албатта сизлар билан, бутун мамлакатимиз ёшлари билан бирга барпо этамиз”, — дейилади табрик матнида.

Бундан ташқари, мамлакатда ёш авлодни ҳар томонлама қўллаб-қувватлаш, уларнинг давлат ва жамият ҳаётидаги фаоллигини ошириш мақсадида ўзининг юксак азм-у шижоати, ижодий ва интеллектуал салоҳияти, истеъдод ва қобилиятини намоён этиб, ҳалол ва самарали меҳнати, турли соҳаларда эришган ютуқлари билан юртимиз тараққиётига, унинг халқаро нуфузини янада юксалтиришга муносиб ҳисса қўшаётган, ватанга меҳри ва садоқати, намунали хулқи ва одоби ҳамда ватанпарварлик фазилатлари билан тенгдошларига ўрнак бўлиб келаётган қуйидаги ташаббускор ва етакчи ёшлар “Келажак бунёдкори” медали билан мукофотланди:

• Мамбетярова Улбосин Мусатдин қизи – Қўнғирот тумани “Мингжарған” маҳалла фуқаролар йиғинидаги ёшлар етакчиси, Қорақалпоғистон Республикаси
• Ниязимбетов Шерзод Кадирбердиевич – Нукус туманидаги Биогумус фермер хўжалиги бошлиғи, Қорақалпоғистон Республикаси
• Йўлдошев Рахимжон Рафукжон ўғли – Андижон қишлоқ хўжалиги ва агротехнологиялар институти агроинженерия ва гидромелиорация факультети деканининг ёшлар билан ишлаш бўйича ўринбосари, Андижон вилояти
• Умматалиева Мохларой Зокиржон қизи – Балиқчи туманидаги 14-умумий ўрта таълим мактабининг география фани ўқитувчиси, Андижон вилояти
• Горев Петр Денисович – Бухоро шаҳридаги “Буюк ипак текстиль” масъулияти чекланган жамияти дизайнери, Бухоро вилояти
• Юсупова Чинора Анвар қизи – Вобкент туманидаги Чинар Мушроом томорқа хизмат масъулияти чекланган жамияти раҳбари, Бухоро вилояти
• Набиқулова Нафиса Ўктам қизи – Сўғдиёна-W профессионал футбол клубининг аёллар жамоаси футболчиси, Жиззах вилояти
• Усмонова Мадина Улуғбек қизи – Жиззах шаҳридаги Гранд Супер Стар масъулияти чекланган жамияти кран машинисти, Жиззах вилояти
• Мансурова Зарина Анвар қизи – Қарши туманидаги 71-умумий ўрта таълим мактабининг информатика фани ўқитувчиси, Қашқадарё вилояти
• Хақбердиев Абдуманнон Ғафурович – Муборак газни қайта ишлаш заводининг цех оператори, Қашқадарё вилояти
• Равшанова Гулҳаё Азаматовна – Навоий вилояти “Зиёкор” аёллар ва ёшлар маркази раҳбари
• Рахмонов Сухроб Юсупович – Навоий шаҳридаги Бур Компрессор Навоий масъулияти чекланган жамияти раҳбари, Навоий вилояти
• Абдуллаева Замира Мухторжон қизи – Чортоқ туманидаги 22-умумий ўрта таълим мактабининг она тили ва адабиёт фани ўқитувчиси, Наманган вилояти
• Рафиков Жахонгир Рахимжонович – Наманган шаҳридаги Эффортлесс Эдуcатион Service нодавлат таълим муассасасининг Старт-21 ўқув маркази раҳбари, Наманган вилояти
• Баликова Чарос Норбек қизи – Шашка бўйича Ўзбекистон миллий паралимпия терма жамоаси аъзоси, Самарқанд вилояти
• Махкамтошева Марҳабо Абдурахмон қизи – Самарқанд давлат университетининг 2-босқич талабаси, Самарқанд вилояти
• Боқиева Феруза Шерали қизи – “Ўзбекистон темир йўллари” акциядорлик жамиятининг “Ўзбекистон” локомотив депоси Афросиёб юқори тезюрар электропоезди машинисти ёрдамчиси, Сирдарё вилояти
• Тошбеков Жўрабек Абдумалик ўғли – Сирдарё туманидаги Software-Девелоперс-Group масъулияти чекланган жамияти раҳбари, Сирдарё вилояти
• Абдумаликов Умиджон Абдумалик ўғли – Термиз туманидаги “Сурхон Термиз Умид” масъулияти чекланган жамияти раҳбари, Сурхондарё вилояти
• Очилдиева Дилноза Ўткир қизи – Қизириқ туманидаги “Баркамол авлод” болалар мактаби тўгарак раҳбари, Сурхондарё вилояти
• Абдуллаев Руслан Анвар ўғли – Бокс бўйича Ўзбекистон миллий терма жамоаси аъзоси, Тошкент вилояти
• Қиёмова Маржона Муродхўжа қизи – Паркент туманидаги “Кумушкон” кутубхонаси раҳбари, Тошкент вилояти
• Иброхимов Жахонгирмирзо Улуғбек ўғли – Марғилон шаҳридаги “Муҳандисона” масъулияти чекланган жамияти директори, Фарғона вилояти
• Турғунова Нодирахон Абдурахим қизи – Жаҳон иқтисодиёти ва дипломатия университетининг 1-босқич магистранти, Фарғона вилояти
• Қаландаров Шоҳруҳбек Мирзабек ўғли – Хонқа туманидаги “Хонқа чорва капитал” масъулияти чекланган жамияти раҳбари, Хоразм вилояти
• Машарипова Гули Раъно Озодовна – Эду Action ИЭЛс тест марказининг Хоразм вилояти бўйича бош координатори
• Ачилова Диёра Алишеровна – Тошкент педиатрия тиббиёт институтининг халқаро факультети ёшлар етакчиси
• Умирзаков Шаҳзод Бахтиёр ўғли – Юнусобод туманидаги Тасс Vision масъулияти чекланган жамияти таъсисчиси, Тошкент шаҳри
• Асқаралиева Маҳлиёхон Акмалжон қизи – Ўзбек Миллий академик драма театри актрисаси
• Жўрақулова Маржона Садриддин қизи – Ўзбекистон Республикаси Ёшлар ишлари агентлигининг “Қизлар овози” клуби раҳбари
• Икромова Тахмина Изатуллоевна – Гимнастика бўйича Республика олий спорт маҳорати мактабининг бадиий гимнастика бўйича спортчиси
• Кадиров Азамат Азизович – Uzbekistan аирwайс акциядорлик жамиятининг Парвозлар хавфсизлиги ва сифат таъминоти бошқармаси А-320 ҳаво кемаси учувчи-нозири
• Мухсумов Жавлонбек Хусниддин ўғли – Абу Али ибн Сино номидаги ихтисослаштирилган мактабнинг халқаро олимпиада захиралари маркази ўқитувчиси
• Рахмонова Наргизахон Бахтиёржон қизи – Ўзбек миллий мақом санъати марказининг Юнус Ражабий номидаги “Мақом” ансамбли артисти
• Сафаров Худойназар Суннат ўғли – “Ўзбекгеологияқидирув” акциядорлик жамиятининг Зарафшон дала геология-қидирув экспедицияси ерости ишлари геологи
• Усманова Мафтуна Анваровна – Тошкент шаҳридаги “Шароит плюс” ногиронлар жамоат бирлашмасининг лойиҳалар координатори
• Хамроев Сардорбек Ислом ўғли – Ўзбекистон Ёзувчилар уюшмаси аъзоси, ёзувчи
• Элмуродова Нигина Бахтиёр қизи – Академик V.Воҳидов номидаги Республика ихтисослаштирилган хирургия илмий-амалий тиббиёт марказининг буйрак трансплантацияси ва реабилитацияси бўлими жарроҳи.