Қирғизистон Иссиқкўл бўйида янги шаҳар қуришни бошлади (фото, видео)

Қирғизистонда Иссиқкўл бўйида “келажак шаҳри” қурилиши бошланди. Бу ҳақда республика президентининг сайтида хабар берилди.

30 июнь куни Садир Жапаров тантанали маросимда шаҳар қурилиши учун тамал тошини қўйди.

Осмон номли шаҳарни етти-ўн йил ичида қуриш режалаштирилган; унда 500-700 минг киши яшаши мумкин бўлади.

Лойиҳанинг қиймати 20 миллиард долларга баҳоланмоқда. Расмийларнинг айтишича, қурилишда бюджет маблағлари ишлатилмайди.

Концепцияга мувофиқ, шаҳар тепадан қараганда қирғиз миллий чолғуси бўлмиш қомузга ўхшаш бўлади. Унинг инфратузилмаси муқобил энергия манбаларидан кенг фойдаланиш, ресурслардан мақбул фойдаланиш, экологик тоза транспорт турлари, шунингдек, яшил иқтисодиёт тамойилларига риоя қилган ҳолда лойиҳалаштирилади.

Эслатиб ўтамиз, 29 июнь куни Туркманистонда Ашхободдан 30 километр жануби-ғарбда жойлашган Арқадағ “ақлли шаҳар”нинг биринчи босқичи очилиш маросими бўлиб ўтди. Туркманистон расмийларига кўра, янги шаҳар илғор рақамли, ахборот-коммуникация ва яшил технологияларни ўзида мужассам этган. Биринчи босқич қурилишига 3,3 миллиард доллар сарфланган.