Турк лираси яна бир бор ўзининг тарихий энг паст кўрсаткичини янгилади. Халқаро Forex бозорида 1 АҚШ доллари деярли 26 лирага етди.
Туркия Марказий банкининг миллий валютани қўллаб-қувватлашга қаратилган банк соҳасидаги талабларни юмшатиш тўғрисидаги қарори фонида лира заифлашмоқда, деб ёзди Reuters.
Миллий валюта учун яна бир салбий омил Туркия Марказий банкининг валюта курсини бошқариш учун валюта захираларидан фойдаланишдан бош тортгани бўлди.
Bloomberg ҳисоб-китобларига кўра, 18 ой давомида регулятор лира курсини барқарорлаштириш учун тахминан 200 миллиард доллар сарфлаган. Май ойи ўрталарида, президентлик сайловлари олдидан Туркиянинг соф халқаро захиралари 2002 йил февраль ойидаги энг паст даражага тушиб кетганди.
Энди Туркия Марказий банки талабларни юмшатиш орқали “анъанавий” пул-кредит сиёсатига қайтиш ниятини яна бир бор тасдиқлади. Ўтган ҳафта Туркия Марказий банки 2021 йил март ойидан бери биринчи марта асосий ставкани йиллик 8,5 фоиздан 15 фоизга оширди. Шу билан бирга, регулятор пул-кредит сиёсатини қатъийлаштиришни давом эттиришга ваъда берди, аммо ставкани ошириш бўйича қадамлар босқичма-босқич бўлишини таъкидлади.
Изоҳ (0)