“Брент” маркали нефть нархи бир баррел учун 74 доллардан ошди

“Брент” маркали нефть нархи ўтган ҳафта пасайганидан сўнг, душанба кунги савдолар пайтида яна кўтарилди.

Россиядаги вазият сармоядорларнинг глобал таъминотга салбий таъсир кўрсатиши мумкинлиги ҳақидаги хавотирлари туфайли котировкаларнинг 1,3 фоизга қисқа сакрашига сабаб бўлди. Бироқ CNN маълумотларига кўра, кейинчалик ўсиш суръати мўтадилроқ бўлди.

Лондоннинг ICE Futures биржасида “Брент” учун август фьючерсларининг нархи бир баррел учун 74,04 долларни ташкил этмоқда, бу аввалги биржа сессиялари якунига нисбатан 0,19 долларга (0,3 фоизга) юқори. 23 июнь, жума куни бу шартномалар бир баррел учун 0,29 долларга (0,4 фоиз) пасайиб, 73,85 долларни ташкил қилганди.

Нью-Йорк товар биржасининг электрон савдоларида WTI нефтининг август ойидаги фьючерслари котировкалари эрталабки соатларда 0,12 долларга (0,2 фоиз) ошиб, бир баррели учун 69,28 долларни ташкил этди. Ўтган сессия натижаларига кўра, улар 0,35 долларга (0,5 фоизга) пасайиб, бир баррел учун 69,16 долларни ташкил қилганди.

Умуман олганда, охирги ҳафтада “Брент” нархи 3,6 фоизга, WTI эса 3,9 фоизга арзонлашди.