“Daryo”ning YouTube’dagi kanalida xonanda Umida Mirhamidova nega QVZda ishtirok etayotgani va chiqishlari keskin tanqidlarga uchragani haqidagi savollarga quyidagicha javob berdi.
“QVZ oilasiga qo‘shilishimning sababi juda oddiy bo‘lgan. Tashkilotchilar yarim final bosqichiga mehmon sifatida chaqirishgan. Men shunchaki chiqishlarni tomosha qilib o‘tirishim kerak edi. Ammo QVZ jamoalarining chiqishlari kutilmagan improvizatsiyalarga boy bo‘ladi. Agrar universitetining jamoasi yigitlari improvizatsiya shartini bajarayotganda, tomoshabinlar orasidan meni tanlashdi. “Nima qilaman?” desam, “Hech nima, shunchaki ishtirok etib bersangiz bo‘ldi”, deyishdi. Xullas, improvizatsiya shartida to‘y sahnasi ko‘rsatildi va jamoa g‘oliblikni qo‘lga kiritdi. Undan keyin “Siz uchun ssenariy yozilgan”, deb yana taklif etishdi. Hech qachon QVZda ishtirok etaman deb o‘ylamagan edim, — deydi xonanda.
Umida Mirhamidova ijtimoiy tarmoqlarda muhokamalarga sabab bo‘lgan chiqishlaridan uyalgani haqida ham aytib o‘tdi.
“QVZdagi chiqishlar ko‘pincha trenddagi gap-so‘zlarga quriladi. Avvaliga sahna ko‘rinishlari ijtimoiy tarmoqlarda ommalashib ketadi, deb o‘ylamagandim. Bu sahna ko‘rinishlari yoshimga to‘g‘ri kelmas ekan, deb uyalgan paytlarim ham bo‘ldi. Ammo yoshlarga yordamim tegayotganidan xursandman. Chunki bularni ham qo‘llab-quvvatlash kerak. Ammo hamisha sahna ko‘rinishlarida ehtiyotkor bo‘lishga harakat qilaman. Bir og‘iz gap bilan ham “Umida Mirhamidova yoshiga yarasha ish qilsa bo‘lmaydimi?” degan e’tirozlarga sabab bo‘lishni istamayman. Tanlov ekan, hammasiga chidab berish kerak, shunda g‘olib bo‘lamiz demayman. Agar yoqmaydigan mavzudagi tomosha bo‘lsa darhol rad etaman. Nafsoniyatimga tegadigan gap-so‘zlarni aytishlariga yo‘l qo‘yman, — deydi Umida Mirhamidova.
QVZ jamoalarining chiqishlari ko‘plab muhokamalarga sabab bo‘ladi. Xo‘sh, Umida Mirhamidova ustoz san’atkor sifatida yoshlarga to‘g‘ri yo‘l ko‘rsata oladimi yoki jamoadosh sifatida ularning kamchiliklaridan ko‘z yumadimi?
“Yoshlar baribir qiziqqon bo‘ladi. Biz ham xuddi shu davrdan o‘tganmiz. Albatta, yo‘l-yo‘riq ko‘rsatishga harakat qilaman. Ammo har narsaga tanqid qilaverib ularni ham bezdirib qo‘ymaslik kerak. Ishonaman, vaqt o‘tgan sari o‘zlariga ba’zi harakatlari erish tuyulib qoladi”, — deydi xonanda.
Videoni to‘liq holda tomosha qiling:
Izoh (0)