Amerika Qo‘shma Shtatlari Tayvan mustaqilligini qo‘llab-quvvatlamaydi va uning Xitoy bilan barcha kelishmovchiliklari tinch yo‘l bilan hal qilinishiga umid qiladi. Bu haqida ayni paytda Xitoyda bo‘lib turgan AQSH Davlat kotibi Entoni Blinken ma’lum qildi.
“Biz Tayvan mustaqilligini qo‘llab-quvvatlamaymiz va barcha kelishmovchiliklar tinch yo‘l bilan hal qilinishini kutamiz”, — dedi u AQSHning Xitoyga nisbatan siyosatining asosiy tamoyillari haqidagi nutqida.
Shu bilan birga, Blinken Qo‘shma Shtatlar status-kvoning bir tomonlama o‘zgarishiga qarshi ekanligini va Tayvanga yetarli darajada mudofaa qobiliyatini saqlab qolishga yordam berishda davom etishini qo‘shimcha qildi.
AQSH Davlat kotibi Entoni Blinken 18-iyun yakshanba kuni Pekinga kelgandi. Bugun u Xitoy yetakchisi Si Szinpin bilan uchrashdi.
Entoni Blinkenning tashrifi AQSH prezidenti Jo Bayden va Xitoy rahbari Si Szinpin o‘rtasidagi uchrashuvlarga zamin yaratishi kutilmoqda. Avvalroq Bayden yaqin oylarda Si bilan uchrashishga umid qilayotganini aytgan.
Izoh (0)