Жанубий Африка Республикаси (ЖАР) президенти Сирил Рамафоса Россия-Украина урушидаги Африка Иттифоқи давлатлари позициясининг 10 та асосий “таркиби”ни санади. Бу ҳақда “Интерфакс-Украина” хабар берди.
Рамафоса Киевда президент Владимир Зеленский билан учрашувдан сўнг ўтказилган матбуот анжуманида бу бўйича гапирган.
“Биз бу ерга олиб келган тинчликнинг асосий банди шуки, урушни ҳал қилиш керак, дипломатик музокаралар йўли билан тинчлик ўрнатилиши зарур”, — деди у.
ЖАР етакчиси кейинги навбатда конфликтнинг кескинлигини юмшатиш зарурлигини айтди.
“Бугун ташрифимиз давомида ракета ҳужумларини эшитдик. Бундай ҳаракатлар тинчлик ўрнатишда унчалик яхши ишламайди. Шу боис, икки томоннинг вазиятни юмшатиш зарурати ҳақида гапиряпмиз, шунда тинчликка қандай эришилиши, вазият қандай ҳал қилиниши кераклиги бўйича йўл топилади”, — деди сиёсатчи.
Рамафоса БМТ Низомига мувофиқ давлатлар суверенитети ва халқлар мустақиллиги ҳурмат қилиниши кераклигини билдирди. У тинчликка эришишда барча мамлакатлар учун хавфсизлик кафолатлари зарурлигини таъкидлади.
Олтинчи йўл Украина ва Россия дон ҳамда ўғит экспортини таъминлаши керак. ЖАР етакчиси “Украинага келиш сабабларидан бири Африка ҳам бу урушнинг салбий оқибатларини бошдан кечираётгани”ни айтди.
“Бизда ғалла нархи ошди, ўғит танқислиги ўша-ўша, уларнинг нархи ҳам кўтарилди”, — деди у.
Рамафоса еттинчи тинчлик пункти уруш қурбонлари бўлган, азоб чекаётганларга инсонпарварлик ёрдами кўрсатиш эканини айтди.
“Биз ана шундай инсонпарварлик ёрдами тарафдоримиз”, — деди у.
Африка етакчиларининг фикрича, саккизинчи пункт маҳбусларни мажбурий алмашиш, жумладан, болаларни қайтаришдир.
ЖАР раҳбари тўққизинчи пунктни урушдан кейинги тикланиш ва уруш қурбонларига ёрдам бериш деб номлади. Сиёсатчи ўнинчи асосий пунктни қуйидагича кўради:
“Музокара давомида Зеленский Африка мамлакатлари билан яхшироқ алоқа қилишимиз кераклигини айтди. Биз бу конфликтнинг тугашини истаймиз. Унинг якунланиши Африка халқлари билан биргаликда бутун дунёга фойда келтиради”, — хулоса қилди ЖАР етакчиси.
Изоҳ (0)