Ҳиндистон шимолидаги Уттар-Прадеш штатида сўнгги икки кун ичида жазирама иссиқ туфайли камида 34 киши ҳалок бўлди. Бу ҳақда Associated Press хабар берди.
“Уларнинг барчаси турли касалликлардан азият чеккан ва аномал жазирама туфайли аҳволи ёмонлашган”, — дейди Баллия тумани бош шифокори Жаянт Кумар.
Марҳумларнинг барчаси 60 ёшдан ошган. Маҳаллий шифокорлар ушбу ёшдаги одамларга кундузи уйда қолишни маслаҳат бермоқда.
Ҳиндистон метеорология департаменти маълумотларига кўра, Баллия туманида максимал ҳарорат Цельсий бўйича 42,2 даража ва бу меъёрдан 4,7 даражага юқори.
Иссиқлик тўлқини Уттар-Прадеш штати бўйлаб электр таъминотида узилишларга олиб келган, оқибатда водопровод ва кондиционерлар ишламай қолган. Ҳукумати электр таъминотини тўлиқ тиклашга ваъда бермоқда, аҳолидан электр энергиясини тежаш сўралган.
Изоҳ (0)