Marvel комикслари рассоми Жон Ромита вафот этди

Marvel комикслари рассоми Жон Ромита вафот этди. Бу ҳақда унинг ўғли кичик Жон Ромита маълум қилди.

Унинг сўзларига кўра, Жон Ромита душанба куни тонгда, уйқусида вафот этган.

“Буни айтиш менга оғир. Отам Жон Ромита душанба куни эрталаб уйқусида вафот этди. У санъат оламининг афсонаси эди ва унинг изидан бориш мен учун шараф. Менинг оиламга ҳурмат сифатида ўз фикрингизни шу ерда қолдиринг”, — деб ёзган у Instagram’даги саҳифасига.

Маълумот ўрнида, рассом комикслардаги фаолиятини 1949 йилда Timely Comics’да бошлаган. Рассом 1950 йилларда DC Comics’да ишлаган ва 1965 йилда Marvel рассомлари қаторига қўшилган. Рассом “Ўргимчак одам”нинг севгилиси Мери Жейн Уотсоннинг ташқи кўринишини яратиб, машҳурликка эришган.

Ромита 1966 йилда The Аmazing Spider-Ман комикслар сериалида Стив Дитконинг ўрнига рассом бўлди. У 1973 йилда Marvel’нинг бадиий директори этиб тайинланган.

Ромита Росомаха, Каратэл, Люк Кейж каби персонажларни яратишда иштирок этган. Бундан ташқари, у 1982 йилда Капитан Marvel комиксларида Моника Рамбеау персонажининг яратилишига ҳисса қўшган.