Индонезия мудофаа вазири Прабово Субианто Россия—Украина урушини тинч йўл билан ҳал қилиш режасини таклиф қилди. Унда тўқнашув чизиғида қуролсизлантирилган ҳудуд яратиш ва у ерга Бирлашган Миллатлар Ташкилоти тинчликпарвар кучларини жойлаштириш кабилар таклиф қилинган. Сингапурда бўлиб ўтган хавфсизлик анжуманида Субианто шундай ташаббус билан чиқди, деб ёзади “ТАСС”.

Индонезиянинг тинчлик режаси қуйидаги бандлардан иборат:

• ҳар икки томон ўт очишни тўхтатиши;
• тўқнашув чизиғида қуролсизлантирилган зона яратиш учун қўшинларни ҳозирги позицияларидан 15 километр орқага олиб кетиш;
• қуролсизлантирилган зонада халқаро тинчликпарвар кучларни жойлаштириш;
• “Баҳсли ҳудудларда аҳолининг истагини объектив тасдиқлаш учун” БМТ томонидан референдум ташкил этиш.

Субианто “баҳсли ҳудудлар” деганда қаерни назарда тутганини тушунтирмади. У Индонезия ушбу жараёнларнинг барчасида иштирок этишга тайёр, деб таъкидлади.

Вазир санаб ўтилган чора-тадбирлар “тарих давомида ўз самарасини кўрсатган”ини қайд этди. У Корея яриморолини мисол қилиб келтирди. “Тўғри, Кореядаги можаро ҳали ҳам доимий ечимга муҳтож. Бироқ 50 йилдан бери ҳеч бўлмаганда қандайдир даражада тинчлик бор, бу оммавий вайронагарчилик ва бегуноҳ одамларнинг ўлдирилишидан кўра яхшироқ”, — дейди Субианто.

Индонезия Мудофаа вазирлиги раҳбари “айбни бир томонга юкламасликка” чақирди. “Можарода ҳар доим иккита томон бўлади. Уларнинг ҳар бири ўзининг ҳақ эканига ишонади”, — деди у. 

Субианто, шунингдек, форум иштирокчиларига Украинада зудлик билан ўт очишни тўхтатишга чақирувчи декларация қабул қилишни таклиф қилди. 

Россиянинг Украинага босқини уруши пайтида бир нечта давлатлар, жумладан, Хитой, Ватикан, Африка давлатлари, Бразилия ва бошқалар ўз тинчлик режаларини илгари сурилган. Украина президенти Владимир Зеленский музокараларни бошлаш учун рус қўшинлари Украинанинг 1991 йилги чегарасидан ташқарига олиб чиқилишини талаб қилмоқда.