Президент томонидан 12 июнь куни имзоланган қонун билан айрим қонун ҳужжатларига Қорақалпоғистонда инвестиция ва ишбилармонлик муҳитини яхшилашга қаратилган қўшимчалар киритилди, деб хабар бермоқда “Ҳуқуқий ахборот” Telegram канали.
Солиқ кодексига киритилган ўзгартиришга кўра, Қорақалпоғистоннинг барча туманларида жойлашган ҳамда мазкур ҳудудда фаолиятни амалга ошираётган тадбиркорлар 2028 йил 1 январгача:
- фойда солиғи, айланмадан олинадиган солиқ, юридик шахсларнинг мол-мулкига солинадиган солиқ ва юридик шахслардан олинадиган ер солиғини белгиланган солиқ ставкаларига нисбатан 50 фоизга камайтирилган солиқ ставкалари бўйича тўлайди;
- ижтимоий солиқни 1 фоиз миқдоридаги солиқ ставкаси бўйича, ЯТТлар эса йилига БҲМнинг бир баравари (330 минг сўм) миқдорида тўлайди.
Йирик солиқ тўловчилар, доимий муассасалар, бюджет ташкилотлари ва давлат корхоналари, устав фондида давлат улуши 50 фоиз миқдорида ва ундан ортиқ бўлган юридик шахслар, устав фондининг 50 фоизи ва ундан ортиғи устав фондида давлат улуши 50 фоиз миқдорида ва ундан ортиқ бўлган юридик шахсга тегишли юридик шахслар бундан мустасно.
Агар солиқ тўловчи мазкур имтиёзлар билан бир қаторда бир вақтнинг ўзида бошқа асослар бўйича солиқ имтиёзларига доир ҳуқуққа эга бўлса, бундай солиқ тўловчи ўз ихтиёрига кўра энг қулай солиқ имтиёзини танлашга ҳақли бўлади. Илгари бундай имтиёз мавжуд эмас эди.
“Давлат божи тўғрисида”ги қонунга киритилган ўзгартиришга кўра, Қорақалпоғистондаги нодавлат таълим ташкилотларининг ўқув жараёнига жалб этиладиган чет эл мутахассислари (ўқитувчилари) 2027 йил 1-октябргача Консуллик йиғимини ҳамда Доимий яшаш ва вақтинча турган жойи бўйича рўйхатдан ўтказганлик учун давлат божини тўлашдан озод қилинади. Илгари бундай норма мавжуд эмас эди.
Қонун расмий эълон қилинган кундан эътиборан кучга кирди.
Ўзбекистонда Якка тартибдаги тадбиркор(ЯТТ)лар қандай тартибда солиқ тўлайди?
I. Бир календарь йили давомида ЯТТнинг олган даромади 100 миллион сўмгача бўлса, қатъий белгиланган тартибда солиқ тўлайди.
II. Бир календарь йилида олган даромади 100 миллион сўмдан ошган, бироқ 1 миллиард сўмдан ошмайдиган якка тартибдаги тадбиркорлар товар айланмасидан олинадиган даромад ҳисобидан солиқ тўлашга ўтказилади.
III. Бир календарь йилида товарлар айланмасидан олинган даромади 1 миллиард сўмдан ошган якка тартибдаги тадбиркорлар солиқларни юридик шахслар учун белгиланган тартибда тўлашга ўтказилади.
Маълумот учун, жойлашган жойи ва фаолият туридан келиб чиқиб, Тошкент шаҳридаги тадбиркорлар учун алоҳида, вилоят марказидаги тадбиркорлар учун алоҳида ва чекка ҳудудлардаги тадбиркорлар учун алоҳида қатъий белгиланган солиқ ставкаси белгиланган.
ЯТТлар учун қандай имтиёзлар берилган?
Мутахассиснинг хабар беришича, ЯТТлар фаолиятини бошлагандан кейин бир ой давомида солиқлардан озод этилади. Шунингдек, I, II гуруҳ ногиронлиги бўлган ЯТТлар белгиланган солиқ ставкасининг 50 фоизи миқдорида солиқ тўлайди.
Агар ЯТТ 2 ёки ундан ортиқ фаолият тури билан шуғулланса (яъни бир пайтда ҳам чакана савдо, ҳам хизмат кўрсатиш) ҳар бири учун алоҳида алоҳида белгиланган қатъий ставкада солиқ тўлайди, аммо базавий ҳисоблаш миқдорининг бир баробари миқдорида умумий битта ижтимоий солиқ тўлаши белгиланган.
ЯТТ ўз фаолият туридан келиб чиқиб, 1 нафардан 3 нафаргача ишчи ёллаш имкониятига эгалиги, яъни чакана савдо билан шуғулланадиган тадбиркор 1 нафаргача, маиший хизмат кўрсатиш билан шуғулланувчи тадбиркор 3 нафаргача ишчи ёллаши мумкин.
Мутахассиснинг таъкидлашича, 2021 йилдан бошлаб киритилган ўзгаришларга асосан якка тартибдаги тадбиркордан солиқ агенти сифатида ёлланган ходимлари учун жисмоний шахслардан олинадиган даромад солиғи (даромаднинг 12 фоизи миқдорида) ундирилади.
Маълумот учун, ҳозирда ЯТТ юзга яқин фаолият турлари билан шуғулланиши мумкин. 2011 йил 6 январь кунидаги Вазирлар Маҳкамасининг қарорида якка тартибдаги тадбиркорлар шуғулланиши мумкин бўлган фаолият турлари белгиланган.
Изоҳ (0)