Хивада Халқаро кимё олимпиадаси ўтказилади

Хивада12—16 июнь кунлари дунёнинг 15 та мамлакатидан келган ҳамда Ўзбекистон вакилларидан иборат ўқувчи-ёшлар иштирокида Халқаро кимё олимпиадаси ўтказилади деб хабар бермоқда Мактабгача ва мактаб таълими вазирлиги матбуот хизмати.

Қайд этилишича, унда дунёнинг 15 та мамлакати — Туркия, Озарбайжон, Ҳиндистон, Вьетнам, Жазоир, Бразилия, Беларусь, Россия, Қозоғистон, Уммон, Грузия, Туркманистон, Қирғизистон, Тожикистон давлатларидан келган ҳамда Ўзбекистон вакилларидан иборат — жами 130 нафар ўқувчи-ёшлар иштирок этади.

11 июль куни Озарбайжон, Россия, Қозоғистон, Тожикистон, Ҳиндистон, Туркия давлатларидан келган 60 дан ортиқ иштирокчи ўқувчи-ёшлар ҳамда уларнинг устозлари Хоразм вилоятига етиб келди.

Халқаро олимпиаданинг юқори савияда ўтиши учун ҳакамлар ҳайъати таркибига маҳаллий ва хорижий мамлакатлар — Туркия, Россия, Қозоғистон, Тожикистон, Покистон давлатларидан академик, профессор-ўқитувчилар ҳамда тажрибали мутахассислар жалб қилинмоқда.

15—18 ёшли ўсмирлар ўртасида ўтказилаётган Абу Райҳон Беруний номидаги халқаро кимё олимпиадаси 2 турда ташкил этилади:

• 1-тур ёзма иш (назарий) шаклида ўтказилиб, иштирокчиларга 5 та топшириқ берилади ва ҳар бир топшириқ максимал 10 баллдан баҳоланади — жами 50 балл. Мазкур тур топшириқларини бажариш учун иштирокчиларга 3 соат вақт ажратилади.
• 2-тур амалий (лаборатория) иш шаклида ўтказилиб, 1 та топшириқ берилади ва максимал 30 балл билан баҳоланади. 2-тур топшириқларини бажариш учун 2 соат вақт ажратилади.

Жами икки тур учун максимал балл 80 баллни ташкил қилади. Сўнгги таҳлиллар асосида ғолиб ва совриндор, деб топилган ўқувчи-ёшлар олтин, кумуш, бронза медаллари ҳамда диплом ва эсдалик совғалари билан тақдирланади.

Олимпиадага фахрий меҳмон сифатида Германия кимё жамияти аъзоси, узоқ йиллар давомида Мюнхен техника университетининг Ноорганик кимё институти директори лавозимида фаолият олиб борган профессор Жоханн Планк ташрифи белгиланган.

Олимпиада доирасида ўқувчи-ёшлар учун халқаро мутахассислар иштирокида бир қатор мастер-класслар ўтказилади. Бундан ташқари, олимпиада иштирокчилари ва меҳмонлар учун Тошкент, Урганч ва Хива шаҳарларининг тарихий ва маданий объектларига саёҳатлар ташкил этилиб, юртимизнинг маданий ва маърифий мероси билан яқиндан таништирилади.

Мазкур олимпиада кимё фани бўйича Ўзбекистон терма жамоаси учун 16—25 июль кунлари Швэтсарияда ўтказиладиган Халқаро кимё олимпиадасига навбатдаги тайёргарлик босқичи бўлиб хизмат қилади.

Халқаро олимпиада 2023 йилдан бошлаб ҳар икки йилда бир марта ўтказилиши белгиланган.