Сурхондарёда ғалладан бўшаган ерларни ёқиб юборганлар жавобгарликка тортилди, деб хабар бермоқда Экология, атроф-муҳитни муҳофаза қилиш ва иқлим ўзгариши вазирлиги Сурхондарё вилояти бошқармаси матбуот хизмати.
Айни кунларда ғалла ўрим-йиғими жадал кетмоқда. Ўз навбатида ғалла ҳосилидан бўшаган майдонлардан самарали фойдаланиш ўрнига буғдой поялари, сомон ва ёввойи ўсимликлар қолдиқларини ёқиб юбориш ҳолатлари учраб турибди.
Сурхондарё вилояти Экология бошқармаси, Жарқўрғон туман бўлими давлат инспекторлари томонидан ўтказилган тезкор рейд тадбирлари давомида Жарқўрғон тумани “Нефтчилар” маҳалласида жойлашган “Эломон Муродович” фермер хўжалигига қарашли ғалладан бўшаган 4 гектар ер майдони такрорий экин экиш мақсадида ёқиб юборилгани аниқланган. Ушбу ҳолат билан табиатга 3 миллион 191 минг 514 сўм зарар етказилган.
Туманнинг “Боботоғ” маҳалласида жойлашган “Олтин Шарқ маскани” фермер хўжалигида ҳам ғалладан бўшаган 2 гектар ер майдони такрорий экин экиш мақсадида ёқиб юборилган. Ушбу ҳолат билан табиатга 1 миллион 867 минг 840 сўм зарар етказилган.
Навбатдаги рейд тадбирлари давомида туманнинг “Янги турмуш“ маҳалласида жойлашган “Ўзбекхон УМУТИ“ фермер хўжалигига қарашли, ғалладан бўшаган, 4 гектар ер майдонини такрорий экин экиш мақсадида шу маҳаллада яшовчи фуқаро Ў.З. томонидан ёқиб юборилгани аниқланган. Бу ҳолат билан табиатга 6 миллион 580 минг 383 сўм зарар етказилган
Рейд тадбирлари давомида ана шундай ҳолатларнинг навбатдагиси туманнинг “Оқтепа” маҳалласида жойлашган “Оқтепалик Суҳроб” фермер хўжалигида кузатилган. Фермер хўжалигига қарашли ғалладан бўшаган 30 сотих ер майдонига такрорий экин экиш мақсадида шу маҳаллада яшовчи Ж.Т. томонидан ёқиб юборилгани аниқланган. Бу ҳолат билан табиатга 349 минг 857 сўм зарар етказилган.
Юқоридаги ҳолатлар юзасидан фермер хўжалиги раҳбарлари ва айбдор фуқароларга нисбатан Маъмурий жавобгарлик тўғрисидаги кодекснинг 88-моддаси (атмосфера ҳавосини муҳофаза қилиш талабларига риоя қилмаслик) 3-қисмига асосан маъмурий баённома расмийлаштирилган.
Ушбу моддага кўра, дала ва аҳоли пунктларида анғиз, хазон ва шох-шаббаларни ёки ўсимликларнинг бошқа қолдиқларини ёқиб юбориш, атмосфера ҳавосини зарарли моддалар билан ифлослантиришга олиб келса, фуқароларга БҲМнинг уч бараваридан 5 бараваригача, мансабдорларга эса 5 бараваридан 10 бараваригача миқдорда жарима солишга сабаб бўлади.
Вилоят бўйлаб назорат тадбирлари давом этмоқда.
Изоҳ (0)