Дам олиш кунлари ҳарорат бир оз пасайганидан сўнг, ушбу ҳафтада ҳарорат аста-секин кўтарила бошлайди, деб хабар бермоқда “Ўзгидромет”.
Қайд этилишича, Ўзбекистон бўйича ўртача иссиқ об-ҳаво сақланиб туради. Ҳафтанинг иккинчи ярмида кундузи ҳаво 37-40 даражагача, жанубда ва чўл ҳудудларда баъзи жойларда 41-42 даражагача исийди. Бу июнь ойининг ўртаси учун экстремал қийматлар эмас, аммо бу даврнинг иқлимий қийматларидан юқоридир.
Республика ҳудуди бўйича ушбу ҳафта давомида об-ҳаво асосан ёғингарчиликсиз бўлиши кутилмоқда, фақат Фарғона водийси вилоятларида, шунингдек, тоғолди ва тоғли ҳудудларда 12–13 июнь кунлари баъзи жойларда қисқа муддатли ёмғир ёғиши ва момақалдироқ бўлиши мумкин.
12–13 июнь кунлари республика бўйича баъзи жойларда шамол тезлиги 15-20 метр/секундгача кучайиши, айрим жойларда чанг-тўзон билан кузатилиши мумкин.
Тошкентда ушбу ҳафтада ҳаво бир оз булутли бўлади, вақти-вақти билан ўзгариб туради, ёғингарчилик кутилмайди. Шамол шарқдан 3-8 метр/секунд тезликда эсади, 12–13 июнда 10 метр/секундгача кучайиши мумкин. Ҳарорат асосан кечаси 23-25 даража, кундузи 37-39 даража бўлади.
Изоҳ (0)