Наманганда гуллар фестивали доирасида шотокан каратэ-до бўйича халқаро турнир бўлиб ўтди

Наманган шаҳридаги “Баркамол авлод” спорт мажмуасида 62-халқаро гуллар фестивали доирасида шотокан каратэ-до бўйича очиқ турнир бўлиб ўтди.

Мусобақанинг тантанали очилиш маросимида Наманган вилояти ҳокимининг ўринбосари Ботир Нуриддинов, Наманган шаҳри ҳокими Ғофиржон Жамолов, Ўзбекистон шотокан каратэ-до ассоциацияси бош мураббийи Хўжамқул Хўжамқулов ва бошқа мутасаддилар иштирок этди.

Маросимда мазкур спорт турини оммалаштиришга муносиб ҳисса қўшган фахрийлар ёдга олинди, ҳозирда барҳаёт бўлганларига ташаккурнома ва эсдалик совғалари топширилди.

Турнирда Ўзбекистон, Тожикистон, Қозоғистон ва Қирғизистондан жами 500 нафарга яқин спортчи иштирок этди. Улар иштирокидаги қизғин баҳслар мажмуага йиғилган кўплаб томошабинларни бефарқ қолдирмади.

Қайд этилишича, Наманганда бўлиб ўтган халқаро турнир ғолиблари жорий йил сентябр ойида ўтказиладиган шотокан каратэ-до бўйича жаҳон чемпионатида иштирок этадиган миллий терма жамоа учун саралаб олинади.