Namanganda gullar festivali doirasida shotokan karate-do bo‘yicha xalqaro turnir bo‘lib o‘tdi

Namangan shahridagi “Barkamol avlod” sport majmuasida 62-xalqaro gullar festivali doirasida shotokan karate-do bo‘yicha ochiq turnir bo‘lib o‘tdi.

Musobaqaning tantanali ochilish marosimida Namangan viloyati hokimining o‘rinbosari Botir Nuriddinov, Namangan shahri hokimi G‘ofirjon Jamolov, O‘zbekiston shotokan karate-do assotsiatsiyasi bosh murabbiyi Xo‘jamqul Xo‘jamqulov va boshqa mutasaddilar ishtirok etdi.

Marosimda mazkur sport turini ommalashtirishga munosib hissa qo‘shgan faxriylar yodga olindi, hozirda barhayot bo‘lganlariga tashakkurnoma va esdalik sovg‘alari topshirildi.

Turnirda O‘zbekiston, Tojikiston, Qozog‘iston va Qirg‘izistondan jami 500 nafarga yaqin sportchi ishtirok etdi. Ular ishtirokidagi qizg‘in bahslar majmuaga yig‘ilgan ko‘plab tomoshabinlarni befarq qoldirmadi.

Qayd etilishicha, Namanganda bo‘lib o‘tgan xalqaro turnir g‘oliblari joriy yil sentyabr oyida o‘tkaziladigan shotokan karate-do bo‘yicha jahon chempionatida ishtirok etadigan milliy terma jamoa uchun saralab olinadi.