Тошкент вилоятининг Тошкент туманида кадастр ҳужжатларини расмийлаштириб бериш учун пул сўраган шахс қўлга олинди, деб хабар беради Бош прокуратура ҳузуридаги департамент.

Қайд этилишича, департаментнинг Тошкент туман бўлими томонидан ДХХ ва ИИБ ходимлари билан ҳамкорликда тезкор тадбир ўтказилган. Тадбирда Б.Н. исмли шахс фуқаро Х.I.нинг 2 та уй-жойи кадастр ҳужжатларини танишлари орқали расмийлаштириб бериши эвазига 700 АҚШ долларини олган вақтида ашёвий далиллар билан ушланган.

Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.

Куни кеча Самарқанд шаҳрида кадастр ходими 1 000 доллар пора билан қўлга олингани тўғрисида хабар берилганди. Шунингдек, Наманганда кутубхона қуриш учун ажратилган ерни 35 минг долларга сотишга уринган депутат қўлга олингани, Қашқадарёда ҳокимлик котиби 3 млн сўм пора билан қўлга тушгани тўғрисида хабар берилганди.

Ноқонуний ер савдолари

Апрель бошларида Навоийда 80 гектар ерни 1 миллиард сўмга сотишга уринган шахслар қўлга олингани, Самарқанд ва Фарғонада ноқонуний ер сотиш ҳолатларига чек қўйилгани тўғрисида хабар берилганди. Шунингдек, Қорақалпоғистон Республикаси ва Бухоро вилоятида ер майдонлари савдоси билан боғлиқ фирибгарлик ҳолатлари фош этилган эди.