Рим шаҳрида бўлиб ўтган қўшма бизнес-форумда Ўзбекистон ва Италия ишбилармонлари ўртасида бир қатор битим ва савдо шартномалари имзоланди. 
Хабарга кўра, 6 июнь куни президентнинг Италияга расмий ташрифи арафасида Рим шаҳрида қўшма бизнес-форум бўлиб ўтди. Унда тегишли вазирлик ва идоралар раҳбарлари, шунингдек, икки давлатнинг етакчи ишбилармон доираларининг 200 дан ортиқ вакиллари иштирок этди. Италия ташқи ишлар ва халқаро ҳамкорлик вазири ўринбосари Эдмондо Чириэлли тадбирни очар экан, Италия ишбилармон доираларининг Ўзбекистонга қизиқиши ортиб бораётганини таъкидлади.
“Ўзбекистон Европа ва Осиё ўртасидаги кўприк ҳисобланиб, шериклик нуқтаи назаридан стратегик аҳамиятга ва катта салоҳиятга эга давлатдир. Биз Ўзбекистоннинг замонавий ривожланишида иштирок этишни истаймиз ва кўп томонлама муносабатларимизни чуқурлаштиришга тайёрмиз. Тадбиркорлар юқори технология, юқори сифатли маҳсулотлар таклиф этиб, катта қизиқиш билдириб, ҳамкорлик қилишга тайёр. Ва бу борада икки томонлама ҳамкорликнинг салоҳиятини тўлиқ рўёбга чиқариш учун кўмак берамиз”, — деди Эдмондо Чириэлли.
Ўзбекистон Европа Иттифоқидаги энг йирик савдо шерикларидан бири бўлган Италия билан ҳар томонлама ҳамкорликни янада мустаҳкамлашга алоҳида эътибор қаратаётгани таъкидланди. Бизнес-форумда Италия компаниялари раҳбарларига Ўзбекистоннинг сармоявий салоҳияти тақдим этилди. Шунингдек, мамлакатда тадбиркорлик ва хорижий инвесторлар фаолияти учун қулай шарт-шароит яратиш борасида амалга оширилаётган ишлар натижалари ҳақида сўзлаб берилди.
Узоқ муддатли ва ўзаро манфаатли ҳамкорликни йўлга қўйишнинг энг истиқболли йўналишлари сифатида тўқимачилик саноати, қишлоқ хўжалиги ва қишлоқ хўжалиги маҳсулотларини қайта ишлаш, қурилиш материаллари ишлаб чиқариш, металлургия, кимё ва автомобилсозлик, электроника ва бошқа кўплаб соҳалар белгиланди.
Форум якунлари бўйича энергетика, қишлоқ хўжалиги, кимё саноати, чарм-пойабзал , тўқимачилик ва машинасозлик саноати, экология, транспорт ва логистика, шунингдек, банк секторини қамраб олган инвестициявий битимлар ва савдо шартномалари имзоланди.
Изоҳ (0)