Тошкент шаҳар Мирзо Улуғбек туманида йўловчи автобуси билан тўқнашган Cobalt ҳайдовчиси вафот этди. Бу ҳақда шаҳар ЙҲХБ ахборот хизмати хабар берди.
Унга кўра, ҳолат 6 июнь куни соат 15:20 ларда Мирзо Улуғбек туманида Дўрмон йўли—Ғазалкент кўчалари кесишган чорраҳада содир бўлган. ЙТҲ натижасида Cobalt ҳайдовчиси олган тан жароҳатлари натижасида тиббий муассасага олиб борилган.
Бироқ тиббиёт ходимларининг саъй-ҳаракатларига қарамасдан, Й.Ф. вафот этган. Шунингдек, Cobalt автомашинасининг 1 нафар йўловчиси ҳам олган тан жароҳатлари натижасида шифохонага ётқизилган, ҳозирда шифокорлар назоратида.
Мазкур ҳолат юзасидан Тошкент шаҳар ИИББ Тергов бошқармаси томонидан Жиноят кодексининг 266-моддаси 2-қисми билан жиноят иши қўзғатилган. Тергов давом этмоқда.
Бу пойтахтда электробус билан боғлиқ илк ҳолат эмас. 5 июнь куни соат 10:00 ларда Яккасарой тумани Шота Руставели — Глинка кўчалари кесишган чорраҳада Lacetti, Malibu-2 ва Yutong русумли электробус иштирокида ҳам ЙТҲ юз берган эди.