АҚШ президенти Жо Байден мамлакатга дефолтдан қочиш имконини берувчи АҚШ қарзининг чегарасини ошириш ҳақидаги қонун лойиҳасини имзолади. Бу ҳақда Оқ уй маълум қилди.

“3 июнь, шанба куни президент давлат қарзи чегарасини 2025 йил 1 январгача тўхтатиб қўювчи 2023 йилги Фискал жавобгарлик тўғрисидаги қонунни имзолади”, — дейилади АҚШ маъмурияти баёнотида.

Бундан ташқари, АҚШ президенти Конгресс раҳбарларига ушбу ҳужжатни қабул қилишда ҳамкорлик қилганликлари учун ҳам миннатдорчилик билдирди.

29 май куни Оқ уй АҚШ президенти Жо Байден ва Вакиллар палатаси спикери Кевин Маккарти давлат қарзининг чегараси бўйича якуний келишувга эришганини маълум қилди. Битим давлат қарзини 2025 йилгача оширишни назарда тутади.

Битимнинг марказий қисми икки йиллик бюджет шартномасидир. У мудофаа ва фахрийлар учун харажатларни ошириш имконияти билан 2024 йил учун харажатларни одатдагидек қолдиришни назарда тутади. 2025 йилда харажатлар даражаси 1 фоизга оширилади.