Хитой мудофаа вазири Ли Шанфу Пекин ва Вашингтон ўртасидаги қарама-қаршилик глобал фалокатга олиб келиши мумкинлигини айтди.

Унинг қўшимча қилишича, Хитой ва Қўшма Штатлар ўртасидаги муносабатлар “икки томонлама муносабатлардан кўра кўпроқ”. Шу билан бирга, Ли Шанфу унинг мамлакати Вашингтон билан мулоқотга интилаётганини қайд этди.

“Халқаро ҳамжамият барқарор муносабатларни кутмоқда ва юзага келиши мумкин бўлган ҳар қандай можаро ёки қарама-қаршиликдан хавотирда. Хитой ва АҚШ ўртасидаги жиддий можаро ёки қарама-қаршилик бутун дунё учун чидаб бўлмас фалокатга айланишини инкор этиб бўлмайди”, — деди Ли Шанфу Сингапурда хавфсизлик бўйича халқаро анжуманида сўзлаган нутқида.

Маъруза давомида Ли Шангфу Хитой ва АҚШ “бир-биридан кўп жиҳатдан фарқ қилишини” таъкидлади.

“Бироқ бу уларнинг икки томонлама алоқаларни кенгайтириш ва ҳамкорликни чуқурлаштириш учун умумий тил ва умумий манфаатларни излашига тўсқинлик қилмаслиги керак”, — дея қўшимча қилди у. Унинг сўзларига кўра, Пекин Осиё-Тинч океани минтақасида хавфсизлик соҳасидаги ҳамкорлик учун очиқ, инклюзив, шаффоф ва тенг ҳуқуқли асос яратиш устида ишлашга тайёр