Ўзбекистон Ташқи ишлар вазирлиги 31 май куни Шимолий Корея томонидан ташувчи космик ракета учирилганидан хавотир билдиради. Бу ҳақда вазирлик матбуот котиби ўзининг Facebook саҳифасига ёзиб қолдирди.
Қайд этилишича, ушбу ҳолат Корея ярим оролидаги кескинликнинг янада кучайишига олиб келади.
“БМТ Хавфсизлик Кенгаши резолюцияларидан келиб чиқадиган мажбуриятларга мувофиқ, оммавий қирғин қуролларининг барча турларини синовдан ўтказишдан бош тортилиши тарафдоримиз.
Ўзбекистон томони бундан кейин ҳам умумий фаровонлик ва тараққиёт йўлида Корея ярим оролида хавфсизликни таъминлаш бўйича фаол қадамларни қатъий қўллаб-қувватлайди”, — дейилади хабарда.
31 май куни эрталаб Жанубий Корея Бирлашган штаб бошлиқлари қўмитаси Шимолий Корея жанубга томон ракета учирганини маълум қилганди. Шу муносабат билан Сеулда ҳаво ҳужумидан огоҳлантириш эълон қилинди, Жанубий Корея пойтахти аҳолисидан эвакуацияга тайёр туриш ва биринчи навбатда “болалар ва қарияларни хавфсиз жойларга етказиш” сўралган. Бир оз вақт ўтгач, мамлакат Ички ишлар вазирлиги шаҳар ҳокимияти томонидан юборилган огоҳлантириш “нотўғри ташкил этилган”ини билдирган.
Аввалроқ Шимолий Корея яқин ҳафталарда сунъий йўлдош учириши ҳақида Японияга билдириш юборган эди. Пхеньян Токиони сунъий йўлдошни 31 май—11 июнь оралиғида учириш режаларидан хабардор қилган.
Изоҳ (0)