Хитойда ёшлар ўртасидаги ишсизлик даражаси рекорд даражага етди. Шу сабабли мамлакат ёшлари кам маошли, малака даражасидан пастроқ ишга жойлашишга мажбур бўлмоқда. Бу ҳақда CNBC хабар берди.
Апрель ойида Хитойдаги шаҳарлик ёшлар (16-24 ёш) ўртасидаги ишсизлик даражаси рекорд даражадаги 20,4 фоизга етди. Бу худди шу даврдаги умумий ишсизлик даражасидан (5,2 фоиз) қарийб 4 баравар кўпдир.
Мутахассислар буни университет битирувчилари сонининг ҳаддан ташқари кўплиги, уларнинг кўпчилиги иш топа олмагани билан боғлайди.
1990 йилларнинг охирида бошланган университет таълимининг оммавийлиги битирувчиларнинг катта оқимини юзага келтирди. Лекин меҳнат бозори юқори малакали ишчиларга бўлган талаб ва таклиф ўртасида зиддиятли. Иқтисодиёт эса бунга тайёр эмас эди, — деди Колумбия университетининг социология профессори Яо Лиу.
Хитойлик университет битирувчиларига малакасиз ишчилар учун ажратиладиган камроқ маошли ишлар таклиф қилинмоқда.
Кимдир бундай позицияни эгаллашга рози бўлса, кимдир рози эмас. Бу эса пировардида ёшлар ўртасида ишсизликнинг кўпайишига олиб келмоқда.
Кўпгина университет битирувчилари ишсиз қолмаслик учун ўзининг таълим даражасига мос келмайдиган лавозимларда ишлаши керак, — деб таъкидлайди профессор Яо Лиу.
Таъкидланишича, бу Хитой ҳукуматини шошилинч ҳаракатга келтириши мумкин.
Иш истиқболларининг камайиши муқаррар равишда ёшлар ўртасида норозиликни келтириб чиқариши мумкин. Уларнинг моддий фаровонлигини таъминлай олмаслик Коммунистик партиянинг Хитой халқи билан тузган ижтимоий шартномасини бузиши мумкин, — дейди China Beige Book бошқарувчи директори Шеҳзод Қози.
Лиуга кўра, Хитой аҳолисининг қариши унинг иқтисодий фаол аҳолисини қисқартиришини ҳисобга олинса, ёшлар ишсизлиги иқтисодиёт учун жуда салбий оқибатларга олиб келиши мумкин.
Аввалроқ дунё бўйлаб 2023 йилда ишчилар учун вазият ёмонлашиши кутилаётгани ҳамда Марказий Осиёда ҳолат қандайлиги ҳақида маълумот берилганди.
Изоҳ (0)