Украинадаги уруш билан боғлиқ Россия ва Ғарб ўртасидаги кескинлик халқаро тинчликпарвар миссияларга таъсир кўрсатди. Бу ҳақда 29 май куни эълон қилинган Стокгольм халқаро тинчлик тадқиқот институти (SIPRI) ҳисоботида айтилади. SIPRI тадқиқотчиси Клаудия Пфайфер Крузнинг айтишича, Европада хавфсизлик ва ҳамкорлик ташкилотининг (ЙХҲТ) Украинадаги кузатувчилари миссияси тугатилиши кескинлик кучайишининг “энг яққол ва бевосита натижаси” бўлди.

Украинадаги хавфсизлик билан боғлиқ вазиятни кузатиш учун 2014 йилда ташкил этилган миссия, у тугатилган вақтда “дунёдаги энг йирик қуролсиз фуқаролик миссияси” эди, дейди Круз. Россия 2022 йилда унинг ишини узайтиришга вето қўйди. ЙХҲТнинг Украинадаги миссияси ўтган йили янгиланмаган ягона миссия бўлса-да, геосиёсий таранглик бошқа жойларга, хусусан, БМТ Хавфсизлик кенгашига ҳам ўз таъсирини кўрсатди.

SIPRI ҳисоботида айтилишича, Украинадаги уруш туфайли у ердаги музокаралар “ўта мураккаблашди”. Хитой ва Россия Хавфсизлик кенгашидаги вето ҳуқуқидан фойдаланмаган бўлса-да, Марказий Африка Республикасидаги Минусcа, Малидаги Минусма тинчликпарвар миссиялари каби бир қанча мандатлар бўйича овоз беришда бетараф қолди.

Баҳс мавзуси Россия ҳукуматига яқин “Вагнер” хусусий ҳарбий компаниясининг Африкадаги фаолияти бўлган. Инсон ҳуқуқларини бузганликда айбланган россиялик аскарлар 2022 йилда Африканинг юқорида қайд этилган давлатларида бўлган. Ушбу давлатларда тинчликпарвар миссияларни узайтириш бўйича музокаралар чоғида Россия БМТ Хавфсизлик кенгашида “Вагнер” фаолиятини қоралашга қарши чиқди.