Twitter эгаси Илон Маск 2024 йилги сайловларда АҚШ президентлиги учун курашадиган номзодларнинг барчасини ўз платформасига таклиф қилди.
“Президентликка номзодларнинг барчасини ушбу платформада хуш кўрамиз!” — деб ёзган у.
Айни пайтда, Флорида губернатори Рон Десантис сайловда иштирок этишини эълон қилаётган пайтда платформада юзага келган техник носозликлар кўплаб ҳазилларга сабаб бўлмоқда.
Жумладан, АҚШ президенти Жо Байден муаммо вақтида Twitter’да “Ушбу линк ишлайди” деб ёзди ва унга ўз сайлов кампанияси учун хайрия тўплайдиган аккаунт ҳаволасини бириктирди.
Республикачилардан бўлган Десантиснинг асосий рақиби, собиқ президент Дональд Трамп унинг баёнотини “фалокат” деб атади.
“Twitter’да Десантиснинг кампанияси бошланиши — ФАЛОКАТ! Унинг бутун сайлов кампанияси фалокатга айланади. ҚАРАБ ТУРИНГЛАР”, — деб ёзди у Telegram каналида.
Эслатиб ўтамиз, 2021 йилда Капитолийга қилинган ҳужумга бағишланган твитлар туфайли Twitter Дональд Трампнинг аккаунтини “бир умрга” блоклаб қўйганди. 2022 йилда Twitter’ни сотиб олган Маск Трампнинг аккаунтини тиклади. Аммо Трамп ҳали уни юритишни бошламаган.
Флорида губернатори 24 май куни АҚШ президентлигига номзодини қўйишини расман эълон қилди.
“Мен Американинг ажойиб қайтишига раҳбарлик қилиш учун президентликка даъвогарман”, — деди Десантис Twitter эгаси Маск билан ижтимоий тармоқнинг овозли чати орқали суҳбатда.
Тадбир бошида 20 дақиқадан кўпроқ вақт овозда узилишлар кузатилди. Маск буни “серверларга юклама ошиб кетган”и билан изоҳлади.
Twitter мобил дастури ишламай қолди ва фойдаланувчилар чатни эшита олмаганидан шикоят қилди. Мунозара модератори Девид Сакснинг сўзларига кўра, носозликлар чатни тинглашга қўшилмоқчи бўлган фойдаланувчилар кўпайиб кетгани сабаб юз берган бўлиши мумкин.
Изоҳ (0)