“Қўқон-1912” бош мураббийи “Динамо”га қарши ўйиндан кейин ҳакамларни танқид қилди. ЎФА ҳолат бўйича суриштирув бошлади

Ўзбекистон футбол ассоциацияси Про-Лига 9-тури доирасида 20 май куни бўлиб ўтган ўтган “Динамо” — “Қўқон-1912” учрашувидан (3:3) кейин меҳмонлар бош мураббийи Муҳсин Низомиддинов томонидан айтилган гаплар юзасидан баёнот берди.

Қўқонликлар устози учрашувдаги ҳакамликдан норози бўлганди.

Ҳамма кўрди, мухлислар ҳам гувоҳ бўлди, ўйин дуранг натижа билан якунланди. “Динамо”га ҳеч қандай хусуматим йўқ. Бироқ бу ўйин кўрсатиб турибди, Самарқанд жамоаси ҳакамлар ёрдамида Про-Лига ўйинларини ютаяпти. Улар бежизга 2-ўринда бораётгани йўқ. Бунақада ўзбек футболи ривожланмайди.

Ҳакамлар голни бекор қилади ёки пенальти қўймайди. Уларнинг ишини кўриб чиқишларини сўрайман. Ортда қолган ўйинларда ҳакамлар ҳақида биронта сўз айтмадим. Биронта голимизда қоидабузарлик кўрмадим. Андишани отини қўрқоқ қўйманглар. Бунақанги ҳакамлик билан кучли томон юта олмайди.

“Динамо”нинг аввалги ўйинларини ҳам кўрдим. Масалан, “Хоразм” ёки “Юниред” ҳам “Динамо” билан ўйинларда мағлубиятга лойиқ эмасди. Мутахассис сифатида айтаман, бу ўйин менда шубҳа туғдирди. Биз ҳам ўша жамоалар каби ҳолатни бошимиздан ўтказдик, — деган Низомиддинов.

Шунингдек, мутахассис “Қўқон-1912” гол урган вазиятда ҳакамлар аввалига голни ҳисобга олиб, кейинроқ офсайд қайд этиб, голни бекор қилганини тушунмаганини айтди. Мазкур ўйинда ВАР тизими бўлмаган ва ҳакамлар қарорни нима сабабдан ўзгартиргани мутахассисга тушунарсиз бўлган.

ЎФА Тартиб-интизом қўмитаси Муҳсин Низомиддинов томонидан қилинган баёнотнинг қанчалик асосли эканлигини ўрганаётгани ва бу борада текширув бошланганини маълум қилди.