БАА, Афғонистон ва Ўзбекистон ишбилармонлари “Туркмангаз” давлат концерни билан 15,6 миллион долларга 40 минг тонна суюлтирилган газ сотиб олиш бўйича шартнома имзолади. Бу маълумотлар Туркманистон давлат товар-хом ашё биржаси томонидан 30 миллион долларга жами 29 та битим тузилган сўнгги аукциондан олинган.
Маълумотларга кўра, суюлтирилган газ (тоннаси 394 доллар) ва автомобиль бензини (676 доллар) алоҳида талабга эга бўлган. Охирги товар бўйича келишув БАА ва афғон брокерлари томонидан тузилган, улар 12,8 миллион долларга 19 минг тонна А-92 ёнилғисини сотиб олган.
Туркманистон Марказий Осиёдаги асосий табиий газ етказиб берувчилардан биридир. Унинг газ конлари пропан-бутаннинг катта миқдорини ўз ичига олади, бу суюлтирилган газ ишлаб чиқариш заводларини қуришни мақсадга мувофиқ қилади.
АҚШ, Канада, Германия ускуналари билан жиҳозланган асосий корхоналар Наип, Багажа, Газлидепе ва Кервен конлари яқинида фаолият юритади.
Ўзбекистон 2022 йил декабрь ойида Туркманистон табиий газини тўғридан тўғри сотиб олишга ўтди. Туркманистон билан қиш мавсуми учун 1,5 миллиард куб метр импорт бўйича шартнома имзоланди.
Таҳлилчиларнинг таъкидлашича, улар ҳозирда белгиланган нархлар билан узоқ муддатли шартнома тузиш имкониятини ўрганмоқда. Ўзбекистон ҳудудидан иккита алоҳида магистрал қувур ўтади, улар орқали Туркманистон Хитой ва Россияга табиий газ экспорт қилади.
Эзиз Бояров, Ашхобод
Изоҳ (0)