Туркманистон президенти Сердар Бердимуҳамедов 4 май куни “Олимпия” стадионида Халқаро футбол федерацияси (ФИФА) президенти Жанни Инфантино билан учрашди. Бу ҳақда ТДҲ давлат ахборот агентлиги хабар берди.
Бердимуҳамедов Туркманистонда профессионал спортчилар сафи кенгайиб бораётгани, спорт иншоотлари барпо этилаётгани, спорт билан шуғуллана бошлаганлар сони кўпаяётганини таъкидлади. Туркманистон футбол федерацияси 1992 йилда ташкил этилган бўлиб, 1994 йилда ФИФА ва Осиё футбол конфедерациясига аъзо бўлган.
Шунингдек, ФИФА раҳбарига замонавий спорт иншоотларига эга Арқадағ шаҳри барпо этилаётгани ва шу номдаги футбол клуби ташкил этилгани ҳақида маълумот берилган.
“Биз ФИФАнинг Туркманистонда футболни янада ривожлантириш бўйича таклифларини қўллаб-қувватлашга тайёрмиз, шунингдек, халқаро футбол турнирларини ўтказиш учун спорт инфратузилмамиздан фойдаланишни таклиф қиламиз”, — деган президент Сердар Бердимуҳамедов.
Жанни Инфантино президентга шахсий футболка, тўп ва ФИФА байроқчасини совға қилган. Шундан кейин улар “Олимпия” стадионини кўздан кечирган.
Бундан ташқари, меҳмонларга “янги Арқадағ шаҳрининг манзарали панорамаси”ни очадиган Пўлат от ҳайкали кўрсатилган.
“Жанни Инфантино бу ерда келажакда ФИФА ўқув-услубий марказини ташкил этиш мақсадга мувофиқлигини қайд этди”, — деб ёзади ТДҲ. Бундан ташқари, уни қуриш бўйича қарор аллақачон қабул қилинган.
Ташриф якунида делегация Халқаро Ахалтеки от спорти мажмуасида бўлган, улар учун “Галкиниш” миллий от спорти ўйинлари гуруҳи намойиш этилган.
“Бизнинг Туркманистон учун ажойиб лойиҳаларимиз бор. Бу мамлакатда футбол ўсишига ишонч ҳосил қилишимиз керак, Туркманистон футбол мамлакати. Унинг футболга бўлган иқтидори ва иштиёқи баланд”, — деган ФИФА раҳбари.
Унинг сўзларига кўра, президент билан мамлакатга сармоя жалб этиш масаласи ҳам муҳокама қилинган.
Бу ҳафта Жанни Инфантино Марказий Осиё давлатларига ташриф буюрмоқда. 2 май куни у Тожикистонга, 3 май куни Қозоғистонга, Туркманистондан эса дарҳол Қирғизистонга йўл олган. У Қирғизистон президенти Садир Жапаров билан учрашиб, унга тўп совға қилган.
Изоҳ (0)