Туркманистондан Ўзбекистонга газ етказиб бериш узилиб қолгани учун “Туркмангаз”нинг олти нафар мансабдори ҳибсга олинди — ОАВ

Туркманистондаги энг йирик “Галкиниш” газ конида юз берган авария ва Ўзбекистонга газ етказиб беришнинг тўхтаб қолгани ортидан “Туркмангаз”нинг олти нафар мансабдори ҳибсга олинди. Бу ҳақда Turkmennews хабар берди.

Ҳибсга олинганлар орасида “Туркмангаз” Моддий-техника ресурслари ва асбоб-ускуналар бошқармаси  раҳбари Шоҳрат Аждаров, “Туркмангазакдириш” уюшмаси (“Туркментрансгаз”) раҳбари вазифасини бажарувчи Шоҳрат Чопанов ҳибсга олинган. Turkmennews’нинг мамлакат ҳукуматидаги манбасининг қайд этишича, “Туркмангаз” раҳбари Ботир Аманов ва унинг ўринбосари Отамурод Чарев ҳозиргача жазодан қутулишга муваффақ бўлган.

Улар “Туркмангаз” фаолиятидаги носозликда ва халқаро бозордаги мавқейини йўқотганликда айбдор экани айтилмоқда. Бош прокуратура текшируви шуни кўрсатдики, Галкиниш конидан Ўзбекистонга газ етказиб бериш мажбурий тўхтатилгани ортидан олти кун давомида етказилган зарар миқдори 59,7 миллион долларни ташкил қилган. Бундан ташқари, Туркманистон Хитойга газ етказиб бермагани учун жарима кутмоқда.

“Хитой конни янада ривожлантиришга, яъни қудуқларни бурғилаш ва газ тозалаш иншоотларини қуришга кўз тикмоқда. Катта эҳтимол билан улар ушбу шартномаларни қўлга киритиши мумкин. Бундай сценарийда Туркманистон Хитойга ўнлаб йиллар давомида газини арзон нархларда бериши керак бўлади”, — дейилади хабарда.

12 январдан Туркманистон “Галкиниш” конидаги техник носозликлар туфайли Ўзбекистонга газ етказиб беришни тўхтатган. Аномал совуқ конда гидрат ҳосил бўлишига олиб келган. Шу сабабларга кўра Туркманистон–Ўзбекистон–Қозоғистон–Хитой газ қувури орқали Хитойга газ экспорти сезиларли даражада камайган.

13 январь куни Сердар Бердимуҳамедов нефть ва газ саноатига масъул вазир ўринбосари Шоҳим Абдраҳмонов ва “Туркмангаз” раҳбари Ботир Амановга сўнгги огоҳлантириш билан қаттиқ танбеҳ берган. Президент норозилигининг аниқ сабаблари айтилмаган, бироқ Абдураҳмонов ва Аманов кондаги техник носозликлар учун жаримага тортилган, бунга газ экспортининг тўхтаб қолгани сабаб бўлган бўлиши мумкин.

Мавзуга доир: Сердар Бердимуҳамедов музлаган “Галкиниш” конини кўздан кечирди (фото)