Тожикистон президенти Эмомали Раҳмон XXI асрнинг охирига келиб, дунёдаги музликлар сони учдан бирга қисқариши мумкинлигини айтди. Сиёсатчи БМТнинг “2025 йилга мўлжалланган йўл харитаси: Музликларни сақлаш халқаро йили” мавзусидаги тадбирида бу ҳақда гапирди.
.jpg)
Унинг сўзларига кўра, мазкур жараён, айниқса, Тожикистонда яққол сезилмоқда.
“Биргина сўнгги 50 йил ичида Тожикистонда мингдан ортиқ музликлар тўлиқ эриб кетган, мамлакат музликларининг умумий ҳажми қарийб учдан бир қисмга қисқарган”, — дейди Эмомали Раҳмон.
Сиёсатчи шу даврда дунёда аҳоли жон бошига тоза сув кўрсаткичи 2,5 баробарга, Марказий Осиё минтақасида эса 4 баробарга камайганини таъкидлади.
“Мутахассисларнинг фикрига кўра, сўнгги уч йил дунёдаги метеорологик кузатувларнинг бутун даври учун энг иссиқ йил бўлди. Аҳоли сонининг ўсиши ва иқтисодий тараққиёт туфайли сувга бўлган талабнинг ошганини ҳисобга олсак, бу жараённинг давом этиши салбий оқибатларга олиб келиши мумкин”, — деди у.
Бундан ташқари, Тожикистон президенти Арктика ва Антарктика музликларининг эриши денгиз сатҳининг кўтарилишига сабаб бўлиб, дунёнинг юз миллионлаб аҳолиси, айниқса, кичик орол давлатларининг ҳаёти ва фаровонлигига таҳдид солаётганини айтди.
“Буларнинг барчаси жиддий ташвиш туғдиради”, — дейди Раҳмон.
Шу муносабат билан у ўртача ҳаво ҳароратини пасайтиришга қаратилган изчил ва келишилган саъй-ҳаракатларни амалга оширишга чақирди. Эмомали Раҳмон 2025 йил Тожикистон музликларни сақлаш бўйича халқаро конференцияга мезбонлик қилишини қайд этди.
Изоҳ (0)