Озарбайжон президенти Илҳом Алиев ва Арманистон бош вазири Никол Пашинян 14 май куни Европа Иттифоқи ташаббуси билан Брюсселда музокара ўтказди. Европа Кенгаши раиси Шарл Мишел матбуотга учрашув натижаларини шарҳлар экан, икки давлат раҳбари Арманистон—Озарбайжон можаросини ҳал қилишнинг бир қанча муҳим жиҳатлари бўйича муваффақиятга эришганини айтди. Шу билан бирга Пашинян ҳам, Алиев ҳам Брюсселдаги музокаралар натижасига ҳозирча изоҳ беришмаган.
Мишелнинг сўзларига кўра, иккала сиёсатчи ҳам “1991 йилдаги Олмаота декларациясига сўзсиз содиқликларини” ҳамда СССР парчаланиши чоғида Арманистон ва Озарбайжоннинг ўз чегараларидаги ҳудудий яхлитлигини тасдиқлаган. Гап асосан этник арманлар истиқомат қиладиган Тоғли Қорабоғнинг Озарбайжон ҳудуди сифатида тан олиниши ҳақида кетмоқда. Чегараларнинг якуний демаркацияси ва демилитаризацияси томонлар ўртасидаги музокаралар мавзуси бўлади, деди Европа кенгаши раҳбари.
Шарл Мишелнинг айтишича, олдинга силжиган яна бир масала “минтақадаги транспорт ва иқтисодий алоқаларни блокдан чиқариш” бўлди. Хусусан, гап Озарбайжоннинг асосий ҳудуди ва унинг эксклави – Нахичеван мухтор республикаси ўртасидаги транспорт йўлаги ҳақида бормоқда. Боку бундай йўлакни Арманистон ҳудуди орқали ўтказмоқчи. Аммо Ереван у мамлакат жанубини қолган қисмидан узиб қўйиши, бундан ташқари, Арманистонни Эронга тўғридан тўғри боғловчи йўлдан маҳрум қилиши мумкинлигидан хавотирда.
Шарл Мишел асирларни ўзаро озод қилиш бўйича “яқин ҳафталар ичида” бўлиб ўтиши керак бўлган музокараларда ҳам муваффақиятга эришилганини айтди. “Биз бедарак йўқолганлар тақдирига ойдинлик киритиш ва миналардан тозалаш ишларини фаоллаштириш муҳимлигини ҳам муҳокама қилдик”, — дея қўшимча қилди европалик расмий.
Изоҳ (0)