Рас ал-Ҳайма — Форз кўрфази соҳиллари бўйида жойлашган, Бирлашган Араб Амирликлари таркибидаги курорт шаҳар. У серқуёш иқлими, қумли пляжлари, улкан тоғ-у, бепоён саҳролари билан туристларнинг диққат марказида.
Яқин 20 йил ичида Дубай каби мегаполисга айланадиган ушбу шаҳарнинг сайёҳлик жозибасини оммага кўрсатиш мақсадида Canaan Travel турагентлиги Centrum Air авиакомпанияси самолётларида Рас ал-Ҳаймага инфотур уюштирди. Саёҳат иштирокчилари 28 апрелдан 5 майга қадар Бирлашган Араб Амирликларининг энг жозибадор шаҳарларидан бирида бўлиб, унинг диққатга сазовор манзиллари билан танишди.
Саёҳат иштирокчилари 28 апрелдан 5 майга қадар Бирлашган Араб Амирликларининг энг жозибадор шаҳарларидан бирида бўлиб, унинг диққатга сазовор манзиллари билан танишди.
Инфо-тур қатнашчилари Рас ал-Ҳайма аэропортига қўниши биланоқ димоққа енгил, бир оз нам, аммо тоза ҳаво урилди. Ҳудди фильмлардагидек манзара ҳосил қилган саҳро ўртасидаги йўл ёқалаб меҳмонхона томон бориш баробарида ҳудуднинг ноёб табиати билан танишиш ҳам бошланди.
Марварид ови
Сафарнинг дастлабки манзили денгиз тубидаги чиғаноқлардан марварид ажратиб олишга ихтисослашган “Сувайди марваридлари” фермаси бўлди. Ферма улуғвор Ал-Ҳажар тоғ тизмасидаги Ал-Рамс номли кичик балиқчилик қишлоғида жойлашган бўлиб, 2004 йилда илк араб марварид етиштирувчиси Абдулла Рашид ал-Сувайди томонидан ташкил этилган. Биологик хилма-хилликка бой ва табиий гўзаллиги билан мақтана оладиган бу ҳудудни осойишталик ўчоғи дейиш мумкин.
Рас ал-Ҳайма марварид саноати 7 минг йиллик тарихга эга. Айнан чиғаноқлар туфайли амирлик минтақадаги энг йирик савдо портларидан бирига айланган. Сайёҳларни ферма фаолияти билан таништирган йигитнинг айтишича, қадимда, ҳали минтақада нефть топилмасидан илгари ҳам марварид кемалари чиғаноқ овлаш билан шуғулланган, ғаввослар 4 ойлаб қуруқликка чиқмаган, кемадаги ишчиларнинг аксарияти нобуд бўлиши одатий ҳол бўлган. Мамлакатда нефть конлари аниқланиб, даромад ортгач, бу ҳолат марварид етиштириш соҳасига ҳам ўзининг сезиларли таъсирини кўрсатган — жараён анча саноатлашган. Рас ал-Ҳайманинг “Амирликлар марвариди” деб аталиши бежизга эмас.
Уч минг йиллик қалъа
Саёҳатнинг иккинчи манзили БАА ҳудудида сақланиб қолган ягона тепалик — Дҳаяҳ бўлди. Бу қалъа бронза даврида (милоддан аввалги 1600—1300 йиллар) қурилган бўлиб, ўшанда маҳаллий ўтроқ аҳоли бу ердан душманларга қарши истеҳком сифатида фойдаланган. Хом ғиштдан қурилган икки иморатли бино эса ХIX асрда қурилган.
Бу ёдгорлик Британия босқини пайтида 1819 йилда юз берган инглизлар ва маҳаллий қавосим қабиласи ўртасидаги жангга гувоҳ бўлган. Энг юқори тепаликка чиқиб, кенг ялангликнинг олис бурчакларига назар ташлаш учун нақ 239 та зинапоядан кўтарилишга тўғри келади.
Кўчманчилар қишлоғи
Рас ал-Ҳайма саҳросининг қоқ марказида Бассата бадавийлар лагери бор. У ерни чўлдаги қишлоқ деб аташади. Ёввойи туя ва эшаклар, акация гуллари билан танилган анклав ҳудуд қадимда кўчманчи араб қабилалари қай тарзда ҳаёт кечирганини тушунишга ёрдам беради.
Салқин ҳаво, эчки жунидан тикилган чодир, бахмал тўшаклар ҳамда экстремал спорт турлари: квадратцикл, туя пойгаси ажойиб уйғунликни акс эттиради. Пост-апокалиптик руҳдаги ландшафт, ёқимли араб мусиқаси фонида турли тадбирлар, олов ўйинлари, рақслар, туристлар иштирокидаги мусобақалар унутилмас онларни тақдим этади. “Минг бир кеча” асари воқеалари айнан шу ҳудудларда юз берган бўлса ажаб эмас.
Бундан ташқари, Бассата лагерида ҳақиқий араб ошхонаси билан танишиш, кўплаб мазали овқатлардан татиб кўриш мумкин. Бу қумтепаликлар ортида ҳаёт қайнайди.
Арвоҳ шаҳар
Ал Жазира Ал-Ҳамра (таржимаси: Қизил орол) — Форс кўрфазида тўлиқ ҳолатда сақлаб қолинган кам сонли тарихий қишлоқлардан бири. У турли дизайндаги кенг, аммо ташландиқ уйлар, қалъа ва қўриқлаш миноралари, турли маиший бинолар, жумладан, масжидлар қолдиқларидан таркиб топган бўлиб, қарийб 50 йилдирки, бу шаҳарчада муқим яшовчи бирор инсон йўқ. 1968 йилда Абу-Даби амирлигига оммавий кўчиш юз берганидан сўнг 2,5 минг инсонга бошпана бўлган жой қаровсиз қолган.
Шунга қарамай, ҳозирда ушбу ҳудуд сайёҳларнинг диққатга сазовор жойларидан ҳисобланади. Ал-Жазира Ал-Ҳамра ЮНЕСКОнинг Жаҳон маданий мероси рўйхатига киритилган. Боиси у — Яқин Шарқдаги минг йиллик классик меъморий ва шаҳарсозлик анъаналарининг яққол намунаси.
Аммо кўпгина бинолар вайронага айланган ёки яроқсиз ҳолга келган. Шу сабабли хавфсизлик нуқтаи назаридан ташриф буюрувчиларга иморатларга чиқмаслик, қоронғу пайтида бу ҳудудда ҳаракатланмаслик тавсия қилинади.
Дунёдаги энг узун зиплайн
Сафар давомида, айниқса, адреналин улашган ва ҳаяжонли манзиллардан бири бу, албатта, зиплайн бўлди. Жаис Flight бутун дунёдаги энг узун зиплайн ҳисобланади — 2,83 километр. Maxсус воситалар ёрдамида тоғнинг бир чўққисидан бошқасига 150 километр/соат тезликда “сузиш” акрофобия (баландликдан қўрқиш)ни енгишга ёрдам беради. 1680 метр баландликдаги 3 дақиқа давомида сиз ўзингизни худди суперқаҳрамондек ҳис қиласиз. Бунинг завқини минг марта эшитгандан бир бор ҳис этган яхши.
Тоғ чанаси
Зиплайн жойлашган ҳудудда, яъни Ал-Ҳажар тоғ тизмасида темир релслар орқали пастга қараб осиб чиқилган йўлак мавжуд. Унга ўрнатилган ўриндиқ орқали юқоридан пастга қараб панорама шаклида айланиб тушиш бир қарашда жуда қўрқинчлидек туюлади, аммо ҳеч қандай хавф йўқ — барчаси қўлда бошқарилади, исталган пайт тезликни пасайтиришингиз мумкин. Соатига 40 километргача тезликда 1840 метрлик эгри чиқизларни босиб ўтиш жараёни тахминан саккиз дақиқани олади.
Чаналарга бир киши ҳам, икки киши ҳам миниши мумкин. Қўлингизда тормоз бўлади, ўзингиз эса ўриндиққа камар ёрдамида маҳкамланасиз. Инструкторнинг кўрсатмасидан сўнг шитоб билан пастга тушиб борар экансиз, танангиздаги адреналинни бевосита ҳис қиласиз.
Хавфсизлик нуқтаи наразидан зиплайн ҳамда тоғ чанасидан учиш пайтида телефондан фойдаланишга рухсат берилмайди. Аммо интернетда бу завқли жараёнлар акс этган видеолавҳаларни топиш мушкул эмас.
Хулоса
Сафар давомида шунга амин бўлдикки, БАА, шунингдек, нефть захиралари топилган бошқа Форс кўрфази давлатлари туризм соҳасига жуда катта инвестиция киритмоқда. Баланд бинолар қуриш ўз йўлига, мамлакатнинг тарихий қадамжолари, гўзал табиатига ҳам эътибор қаратиляпти. Бунинг ортидан ҳозир Рас ал-Ҳайма сайёҳларнинг севимли масканига айланиб улгурган. Боиси Дубай, Абу-Даби каби мегаполислар одамлар билан гавжум бўлса, бу шаҳар айни дам олишга мўлжалланган — “тинч, сокин, мазза: асаблар дам олади”.
Агар оилавий дам олишни мўлжаллаётган бўлсангиз, Рас ал-Ҳайма сизни кутмоқда. Ҳамёнбоп нархлар, юқори сифатга эга Cанаан Travel тур агентлиги барча қулайликларни ўз ичига олган (all inclusive) турларни таклиф этади.
- Сайт: https://canaan.uz/
- Telegram: https://t.me/canaan_uz/
- Instagram: https://instagram.com/canaan.uz/
- Телефон: +998-78-888-07-40
Агар Ўзбекистоннинг турли ҳудудлари ёки хорижга учиш мақсадида авиачипталар излаётган бўлсангиз, Centrum Air қанотларидан фойдаланинг.
- Сайт: https://centrum-air.com/
- Instagram: https://www.instagram.com/centrumair/
- Телефон: +998-55-518-88-88
Маълумотлар шериклик ҳуқуқи асосида тайёрланди
Изоҳ (0)