Қорақалпоғистонда кейтеринг усулида етказиб берилган озиқ-овқат маҳсулотлари ичидан таблетка кўринишида дори воситалари чиққани ҳақида хабар тарқалди. Қорақалпоғистон прокуратураси ҳолат юзасидан маълумот берди.
Қорақалпоғистон прокуратураси томонидан ўтказилган терговга қадар текшириш ҳаракатлари давомида аниқланишича, бир гуруҳ шахслар кейтеринг усулида озиқ-овқат таъминотини амалга ошираётган тадбиркорларга нисбатан туҳмат уюштириш орқали уларни обрўсизлантириш мақсадида, 3 та ҳолатда ичига дори воситалари жойлаштирилган булка ва пряник маҳсулоти, гўёки Элликқалъа ва Беруний туманларидаги таъминотчилар томонидан тарқатилгани ҳақидаги иддаолар билан “Антикоррупция” Telegram каналига асоссиз ва нохолис маълумотлар жойлаштирилишига эришиб, тадбиркорлик субъектларининг ишбилармонлик нуфузига путур етказган.
Ҳозирда мазкур ҳолат юзасидан Жиноят кодексининг 139-моддаси 3-қисми “г” банди (туҳмат) ва 192-моддаси (рақобатчини обрўсизлантириш) билан жиноят иши қўзғатилган. Жиноят иши тергови якунига кўра, айбдор шахсларнинг жавобгарлик масаласи ҳал этилади.
Шу каби ҳолат ҳақида каналда 13 апрелда ҳам хабар тарқалганди. Унда мактабларда бундай ҳолат биринчиси эмаслиги қайд этилганди. Ўшанда Элликқалъа тумани ҳокимлиги ахборот хизмати ҳолатга муносабат билдириб, туман прокуратураси ва санитария-эпидемиологик осойишталик ва жамоат саломатлиги бўлими масъул ходимлари томонидан ўрганиш ишлари олиб борилиб, экспертиза хулосасини олиш учун озиқ-овқат маҳсулотлари намунаси Республика санитария-эпидемиологик осойишталик ва жамоат саломатлиги бошқармасига юборилганини маълум қилганди.
Ундан аввалроқ Қорақалпоғистоннинг Хўжайли туманида мактаб ўқувчиларига берилган озиқ-овқат маҳсулотлари орасидан қум ва қизлар тўғноғичи чиққанди.
Изоҳ (0)