Қорақалпоғистонда сифатсиз озиқ-овқатлар тарқатилган мактаблар директорлари жаримага тортилди

Олий Мажлис Сенатининг Фан, таълим ва соғлиқни сақлаш масалалари қўмитаси ишчи гуруҳи томонидан Қорақалпоғистон Республикаси ҳамда Хоразм вилояти ҳудудидаги бошланғич синф ўқувчиларига бепул овқат бериш тизими жойларга чиқиб, айрим мактаблар мисолида ўрганилди. Бу ҳақда парламент юқори палатаси матбуот хизмати хабар берди.

Ҳозирги кунда Қорақалпоғистон Республикасидаги 716 та мактабнинг 143 688 нафар бошланғич синф ўқувчиларига кейтеринг тизимида фаолият юритувчи тадбиркорлик субъектлари томонидан бепул нонушта берилиши йўлга қўйилган.

Ўз навбатида, Фан, таълим ва соғлиқни сақлаш масалалари қўмитаси раиси О.Иминов бошчилигидаги ишчи гуруҳ томонидан Қорақалпоғистон Республикасининг Чимбой, Кегейли, Тўрткўл ҳамда Қўнғирот туманларидаги 10 га яқин мактаблардаги ҳолат яқиндан ўрганилган.

Ўрганиш жараёнида тадбиркорлар томонидан кейтеринг хизмати ўз вақтида сифатли кўрсатилаётгани маълум бўлган. Бироқ мазкур жараёнларда озиқ-овқат етказиб бериш жараёнида айрим бефарқликларга йўл қўйилаётгани аниқланган. Жумладан, Чимбой ва Кегейли туманларига маҳсулотлар кейтеринг ташкилоти томонидан йўловчи ташувчи Damas автомашиналарида етказиб берилаётгани кўзга ташланган. Кегейли туманидаги айрим мактабларда маҳсулотларни қабул қилиб олиш жараёнида эътиборсизликка йўл қўйилгани тасдиқланган. Мазкур мактаб директорлари сифатсиз маҳсулотларни қабул қилиб олгани учун санитария ва эпидемиологик осойишталик ва жамоат саломатлиги хизмати томонидан жаримага тортилган.

Шунингдек, сенатор Манзура Салимова бошчилигидаги ишчи гуруҳ эса Хоразм вилоятидаги ҳолатни ўрганган.

Қайд этилишича, 2022 йилда бошланғич синфлар мавжуд бўлган умумий ўрта таълим мактаблари 524 тани (бошланғич синф ўқувчилари жами 137 261 нафар), 2023 йилда 525 тани (бошланғич синф ўқувчилари жами 137 030 нафар) ташкил этган.

Хоразм вилояти халқ таълими бошқармасига 2022 йилда бюджет маблағлари ҳисобидан жами 58 миллиард 149,5 миллион сўм ажратилган бўлиб, шундан 47 миллиард 869 миллион сўми овқатлантириш харажатлари учун ажратилган.

Халқ таълими вазирлиги томонидан Санитария-эпидемиологик осойишталик ва жамоат саломатлиги хизмати билан келишилган ҳолда ўқувчиларни овқатлантириш учун мўлжалланган 5 кунлик таомнома ва таом тайёрлаш бўйича технологик карталар тасдиқланган.

Бу борада сенатор Манзура Салимова Гурлан, Шовот, Янгиариқ туманлари ва Хива шаҳридаги умумтаълим мактабларига етказиб берилаётган бепул озиқ-овқат маҳсулотлари сифатини кўздан кечирган.

Ўрганишлар натижасида, етказиб берилган маҳсулотлар таркиби ва сифати устидан назоратни таъминлаш мақсадида тузилган махсус комиссия вазифалари белгилаб берилмаган. Маҳсулотлар сифатини назорат қилиш журнали юритилмаган. Қабул қилиб олинган маҳсулотлар қадоғида ишлаб чиқариш муддати кўрсатилмаган ҳолда, қабул қилинган.

Бу борада сенатор тадбиркор ва мактаб масъулларига белгиланган тартиб-қоидаларга қатъий амал қилиш, маҳсулотларни сақлашда санитария ва гигиена талабларига риоя қилиш кераклиги юзасидан ўз таклиф ҳамда тавсияларини билдирган.

Юқорида аниқланган айрим камчиликларни тезкор бартараф этиш, ишни тизимли давом эттириш юзасидан жойларда тушунтириш ишлари олиб борилган, мактаб директорлари ҳамда тадбиркорлар иштирокида семинарлар ўтказилган.

Аввалроқ Қорақалпоғистондаги айрим мактабларда ўқувчиларга сифатсиз озиқ-овқат маҳсулотлари берилгани аниқланганди. Хусусан, болаларга берилаётган озиқ-овқат маҳсулотлари белгиланган меъёрга жавоб бермаслиги, шунингдек, ичимлик суви билан таъминланмагани, иссиқ чой билан таъминлаш учун эса шароит тўлиқ яратилмагани маълум бўлган эди.