Toshkent shahar Yakkasaroy tumanida piyodalar harakatlanishiga xalaqit berib kelgan qurilish mas’ullari javobgarlikka tortildi. Bu haqda Tabiat resurslari vazirligi Toshkent shahar boshqarmasi xabar berdi.
Bloger Nikita Makarenko o‘zining Telegram’dagi kanali orqali Yakkasaroy tumanida olib borilayotgan qurilish ishlari piyodalar harakatlanishiga xalaqit bergan holda amalga oshirilayotganini ma’lum qildi. U qurilish bo‘layotgan hudud tuproqlari tashqariga chiqib ketgani, natijada piyodalar avtomobil yo‘lidan harakatlanishga majbur bo‘layotgani tasvirlangan videolarni joylashtirgan va poytaxt hokimligi hamda Qurilish vazirligini bunga chora ko‘rishga chaqirgan.
Mazkur holat Toshkent shahar Tabiat resurslari boshqarmasi Yakkasaroy tuman inspeksiyasi tomonidan borib o‘rganilib, qurilish obyektidan hosil bo‘lgan tuproqlar ko‘cha yuziga chiqib ketgani aniqlangan.
Ushbu holat tezkor ravishda Yakkasaroy tuman hokimligi, TOB bilan birgalikda bartaraf etilgan. Mazkur holatga yo‘l qo‘ygan qurilish tashkiloti mas’ullariga nisbatan Ma’muriy javobgarlik to‘g‘risidagi kodeksning 91/1-moddasi (belgilanmagan joylarga qattiq maishiy va qurilish chiqindilarini tashlash, shuningdek, suyuq maishiy chiqindilarni to‘kish) bilan BHMning 3 barobari (990 ming so‘m) miqdorida jarima qo‘llanilgan.
Kuni kecha Toshkentda 3 qavat qilib qurilishi rejalashtirilgan binoda noqonuniy tartibda qo‘shimcha 9 qavat va mansarda qurgan tadbirkor aniqlangandi.
Izoh (0)