Samarqand tumanida fuqaroning 6 bosh qo‘yi bo‘g‘izlanib, egasiga tahdidomuz xat qoldirilgani to‘g‘risida xabar berilgandi. Samarqand viloyat IIBning ma’lum qilishicha, mazkur jinoyatni sodir etgan guruh a’zolari qo‘lga olingan.
Qayd etilishicha, 23-aprel kuni tuman IIBga “Badal” MFYda yashovchi 28 yoshli B.F. ariza bilan murojaat qilgan. Unda 22-aprel kuniga o‘tar kechasi tumanning “Badal” mahallasi hududida joylashgan o‘ziga tegishli dehqon xo‘jaligi yer maydonidagi qo‘yxonasiga nomaʼlum shaxslar g‘ayriqonuniy ravishda kirib, qo‘yxonadagi 12 bosh qo‘ydan 6 donasini so‘yib, 3 donasini yashirin ravishda talon-toroj qilganini bildirgan.
Voqea joyi tezkor-tergov guruhi tomonidan ko‘zdan kechirilib, tahdidli so‘zlar yozilgan daftar varag‘i daliliy ashyo sifatida hujjatlashtirilib, xatshunoslik ekspertizasi tayinlangan.
Holat yuzasidan Jinoyat kodeksining 169-moddasi (o‘g‘rilik) 2-qismi “g” bandi bilan jinoyat ishi qo‘zg‘atilib, tergov harakatlari davomida jinoyatni sodir etgan shaxslar aniqlangan.
Jami uch nafar shaxs hodisa sodir bo‘lgan tunda qo‘yxonaga borib, qo‘ylarni bo‘g‘izlab, uch donasini Nexia’ga ortib ketgan. Ular qo‘ylardan birini so‘yib, qolgan ikki donasini yashash xonadonida saqlab kelgan.
Hozirda tergov ishlari davom ettirilib, jinoiy guruh tashkilotchisini qo‘lga olish choralari ko‘rilmoqda.
Izoh (0)