Туркия мухолифати етакчиси, Олти мухолифатчи партияси альянсидан (Халқ альянси) номзод Камол Қиличдарўғли Россияни фитнада айблаб, “Туркия давлатидан қўлини тортишни” талаб қилди. Бу ҳақда у Twitter’даги саҳифасида маълум қилди.
Маълум қилинишича, Қиличдарўғли Россияни сохта маълумотларни нашр этиш ва фитна уюштиришда айблаган. Унинг баёноти Эрдўғон курд жангарилари етакчиси Қиличдарўғлига овоз беришга чақирган видеони кўрсатганидан кейин эълон қилинган.
“Ҳурматли россиялик дўстлар, сиз кеча Туркияда фош этилган монтажлар, фитналар, Deep Fake контенти ва ёзувлар ортида турибсиз. 15 майдан кейин ҳам дўстлигимизни давом эттирмоқчи бўлсангиз, қўлингизни Туркиядан узоқ тутинг. Биз ҳамкорлик ва дўстликни қўллаб-қувватлашда давом этамиз”, — деб ёзди у.
Қиличдарўғли овоз бериш жараёнига аралашишга қайси рус гуруҳининг алоқаси борлигига аниқлик киритмади.
Россиянинг муносабати
Россия президенти матбуот котиби Дмитрий Песков Кремль Туркиядаги президентлик сайловларига аралашганини рад этди. У Россия бошқа давлатларнинг “ички ишлари ва сайлов жараёнларига аралашмаслиги” ва Туркия билан муносабатларни қадрлашини айтди.
“Икки томонлама муносабатларни юксак қадрлайдиган давлат шеригига нисбатан ҳеч нарса қилмайди”, — деди у.
Песков Россия бундай даъволарни “қатъий рад этишини” қўшимча қилди.
“Биз расман шуни эълон қиламизки, ҳеч қандай аралашув ҳақида гап бўлиши мумкин эмас. Агар кимдир жаноб Қиличдарўғлига шундай маълумот берган бўлса, улар ёлғончидир”, — деган у.
Изоҳ (0)