Turkiya muxolifati yetakchisi, Olti muxolifatchi partiyasi alyansidan (Xalq alyansi) nomzod Kamol Qilichdaro‘g‘li Rossiyani fitnada ayblab, “Turkiya davlatidan qo‘lini tortishni” talab qildi. Bu haqda u Twitter’dagi sahifasida ma’lum qildi.
Ma’lum qilinishicha, Qilichdaro‘g‘li Rossiyani soxta ma’lumotlarni nashr etish va fitna uyushtirishda ayblagan. Uning bayonoti Erdo‘g‘on kurd jangarilari yetakchisi Qilichdaro‘g‘liga ovoz berishga chaqirgan videoni ko‘rsatganidan keyin e’lon qilingan.
“Hurmatli rossiyalik do‘stlar, siz kecha Turkiyada fosh etilgan montajlar, fitnalar, Deep Fake kontenti va yozuvlar ortida turibsiz. 15-maydan keyin ham do‘stligimizni davom ettirmoqchi bo‘lsangiz, qo‘lingizni Turkiyadan uzoq tuting. Biz hamkorlik va do‘stlikni qo‘llab-quvvatlashda davom etamiz”, — deb yozdi u.
Qilichdaro‘g‘li ovoz berish jarayoniga aralashishga qaysi rus guruhining aloqasi borligiga aniqlik kiritmadi.
Rossiyaning munosabati
Rossiya prezidenti matbuot kotibi Dmitriy Peskov Kreml Turkiyadagi prezidentlik saylovlariga aralashganini rad etdi. U Rossiya boshqa davlatlarning “ichki ishlari va saylov jarayonlariga aralashmasligi” va Turkiya bilan munosabatlarni qadrlashini aytdi.
“Ikki tomonlama munosabatlarni yuksak qadrlaydigan davlat sherigiga nisbatan hech narsa qilmaydi”, — dedi u.
Peskov Rossiya bunday da’volarni “qat’iy rad etishini” qo‘shimcha qildi.
“Biz rasman shuni e’lon qilamizki, hech qanday aralashuv haqida gap bo‘lishi mumkin emas. Agar kimdir janob Qilichdaro‘g‘liga shunday ma’lumot bergan bo‘lsa, ular yolg‘onchidir”, — degan u.
Izoh (0)