“Вагнер” хусусий ҳарбий компанияси асосчиси Евгений Пригожин Россия мудофаа вазири Сергей Шойгуни охирги ойларда фронт чизиғининг энг қақшаткич жанглари давом этаётган Бахмут шаҳрига келишга чақирди. Бизнесменнинг мурожаати 12 май тонгида унинг матбуот хизмати томонидан эълон қилинди.
“Мураккаб оператив вазият, шунингдек, жанговар ҳаракатларни олиб боришдаги сизнинг узоқ йиллик тажрибангизни ҳисобга олган ҳолда Россия ҳарбийлаштирилган бўлинмаси назорати остида бўлган Бахмут ҳудудига келиб, юзага келган ҳолатни ўзингиз баҳолашингизни илтимос қиламан”, — деб ёзади Пригожин.
Хатда, шунингдек, айни вақтда “Вагнер” ёлланма жангчилари Бахмутнинг 95 фоиздан ортиқ ҳудудини назорат қилаётгани ва ҳужумлар давом этаётгани, бироқ Россия Қуролли кучлари бўлинмалари байроқлари ўрнатилган жойларда “душман қатор муваффақиятли қарши ҳужумларни” амалга оширгани таъкидланган.
Евгений Пригожин снарядлар йўқлиги сабаб жангчиларининг Бахмутдаги позициясини 10 май куни Россия Мудофаа вазирлиги бўлинмаларига топширишини маълум қилганди. Кўп ўтмай у ёлланма жангчилар Бахмутдан кетмаслигини айтди. The Washington Post’нинг ёзишича, Россия Мудофаа вазирлиги “Вагнер” раҳбарини обрўсизлантириш режасини ишлаб чиққан.
Изоҳ (0)