Россия давлат думаси мамлакат фуқаролигини олган муҳожирларни Украинадаги урушга ёллаш имконини берувчи лойиҳани тайёрламоқда. Бу ҳақда “РИА Новости” хабар берди.
Депутат Михаил Матвеевга кўра, Марказий Осиё ва Кавказортидан келганларни ”махсус операция”га чақиришга рухсат берувчи, шунингдек, улардан олдинги чизиқда қурилиш батальонида фойдаланишга чақирувчи қонун лойиҳаси тайёрланмоқда.
“Ташаббусим бошқа ватани ва паспорти бўлмаган русларнинг ҳарбий мажбуриятларини Россия фуқаролигини олган мигрантлар билан тенглаштиришдан иборат. Гап Россия армиясининг мавжуд бўлинмалари ўртасида тақсимлаш учун сафарбарлик ва ҳарбий хизматга чақириш имконияти ҳақида кетмоқда. Уларнинг сони ҳар бир взводда 2-3 тадан кўп бўлмаслиги керак, шунда уларнинг ъюртдошлариъ ҳарбий интизомни бузмайди”, — дейди Матвеев.
У мигрантлардан жанг майдонида олдинги позицияда қурилиш батальони сифатида фойдаланилишини қўшимча қилди. Депутат қонун лойиҳасининг тайёрланишини энди икки фуқароликка эга бўлганлар муддатли ҳарбий хизматга чақирилмаслиги билан изоҳлади.
“Улар фақат шартнома бўйича Россия қуролли кучларига қўшилиш учун кўнгилли бўлиши мумкин”, — таъкидлади депутат.
Шунингдек, Матвеев ҳокимият ва махсус хизматларнинг миграция ва демографик муаммога ёндашувини тубдан ўзгартирмасдан туриб, муаммони ҳал қилиб бўлмаслигини айтди.
Изоҳ (0)