Ўзбекистон фуқароларини Польша, БАА ва Эстонияга ишга жўнатишни ваъда қилиб, фирибгарлик қилган шахслар ушланди.
Бош прокуратура ҳузуридаги департаментнинг Чилонзор туман бўлими томонидан ДХХ ходимлари билан ҳамкорликда ўтказилган тезкор тадбирда фуқаро М.Т. фуқаро О.Х.нинг ишончига кириб, унга юқори лавозимда ишловчи танишлари ёрдамида Польшага ишга жўнатиш эвазига 5100 АҚШ долларини олган вақтида ушланган.
Шу каби департамент ҳамда ДХХнинг Жиззах вилояти бошқармалари томонидан ўтказилган тезкор тадбирда, фуқаро А.Р. фуқаро М.К. ва унинг турмуш ўртоғи B.А.ни БААнинг Дубай шаҳрига ишга жўнатиш эвазига 1200 доллар олган вақтида ушланган.
Департамент ҳамда ДХХнинг Сирдарё вилояти бошқармалари томонидан ўтказилган тезкор тадбирда эса, фуқаро Р.И. фуқаро А.С.ни танишлари ёрдамида 2000 доллар эвазига Эстонияга ишга жўнатишни ваъда қилиб, шундан 1100 долларни олган вақтида ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)