Андижон туманида ҳайдовчилик гувоҳномасини олиш учун назарий ва амалий имтиҳонлар ўтказиладиган инновацион Имтиҳон маркази ишга тушди. Бу ҳақда “Дарё” мухбири Умиджон Мамарасулов хабар бермоқда.
Бутун жараён тўлиқ автоматлаштирилган бўлиб, назорат қилиш инсон омилисиз бошқариладиган Марказ ҳар куни назарий имтиҳондан ўтишни истаган 450 дан ортиқ, амалий имтиҳонлар бўйича эса 300 нафар номзодларни қабул қилиши мумкин.
Номзод марказга келиб, топширган имтиҳонларининг ҳар бир босқичи белгилаб бориладиган индивидуал QR-код олади. Назарий имтиҳондан муваффақиятли ўтиш учун 25 дақиқа ичида 20 та тест саволларидан камида 18 та саволга тўғри жавоб беришингиз керак.
Агар имтиҳоннинг ушбу қисми муваффақиятли топширилса, номзод амалий имтиҳонни топшириш ҳуқуқини олади. Кутиш хонасида ҳаммага кўрсатмалар берилади, шунингдек, видео кўрсатма ҳам мавжуд бўлиб, унда машқлар кетма-кетлиги ва уларни қандай бажариш кераклиги тўлиқ кўрсатилган.
Агар 99 та жарима бали чегарасидан ошмаса, имтиҳон муваффақиятли топширилган деб ҳисобланади. Имтиҳоннинг амалий қисми муваффақиятли топширилмаган тақдирда номзод, назарий имтиҳон муваффақиятли топширилган кундан бошлаб 2 ой ичида ҳар 7 кун оралиғида қайта топшириши мумкин.
Амалий имтиҳонни қабул қилиш учун Марказда учта майдонли автоматлаштирилган автодром мавжуд. Уларнинг биттасида, B, C ва D тоифаларидаги, яъни енгил автомобиль, юк машинаси ва автобусни ҳайдаш ҳуқуқини берувчи ҳайдовчилик гувоҳномасини олмоқчи бўлган номзодлар имтиҳон топширадилар. Иккинчисида, А тоифасидаги — мототранспорт воситаларини бошқариш ҳуқуқини олишни истаганлар ўзларининг амалий кўникмаларини намойиш этадилар. Учинчиси транспорт воситаларини тиркама билан бошқариш учун BЕ, CE ва DЕ тоифаларига имтиҳон топшираётганлар учун мўлжалланган.
Назария ва амалиёт бўйича қўшимча тайёргарликка муҳтож номзодлар учун Марказда экспресс-курслар мавжуд.
Имтиҳоннинг икки босқичидан муваффақиятли ўтгандан сўнг, номзодга ЙҲХБга мурожаат этиши керак бўлган сертификат берилади. Берилган сертификат ЙҲХБ маълумотлар базасидан текширилгандан сўнг, унга ҳайдовчилик гувоҳномаси берилади.
Йўл ҳаракати хавфсизлиги масаласи бугунги кунда жуда муҳим ҳисобланади. Тошкент имтиҳон маркази амалиётидан кўриниб турибдики, 2022 йилнинг февраль ойидан декабргача бўлган даврда 27 626 нафар номзоддан фақат 13 357 нафари имтиҳондан муваффақиятли ўтган, кўплари бир неча такрорий имтиҳонлардан сўнг.
Изоҳ (0)