Тошкент вилоятида талаба йигит Telegram’да нашида тарқатгани учун уч йилга қамалди

Тошкент вилоятида Telegram’да нашида тарқатган талаба йигит уч йилга қамалди. Бу ҳақда Олий суд ахборот хизмати хабар берди.

Хабарга кўра, Ж.У.га тегишли бўлган iPhone Х холислар иштирокида кўздан кечирилган вақтда унинг фойдаланувида бўлган телефон рақамига очилган Telegram профили ёрдамида ўзбек тилидаги “Шаҳид бўлиб кетсак рози бўлингиз” номли “жиҳод” ва “ҳижрат”га даъват қилувчи диний мазмундаги нашидаларни 10 нафар аъзоси бўлган “Алҳамдулиллаҳ.” номли гуруҳга тарқатгани аниқланган. 

Шу боис Ж.У.га тегишли бўлган телефон ашёвий далил сифатида холислар иштирокида ҳужжатлаштириб олинган. Вазирлар Маҳкамаси ҳузуридаги Дин ишлари бўйича қўмитанинг ИР-1719-сонли хулосасида тақдим этилган материалдаги маълумотлар ақидапарастлик ғоялари билан йўғрилгани, уларни Ўзбекистон ҳудудига олиб кириш, тайёрлаш ва тарқатиш тақиқлангани қайд этилган.

Жиноят ишлари бўйича Оққўрғон туман судининг 2023 йил 8 майдаги ҳукмига кўра Ж.У. (2002 йилда Тошкент шаҳрида туғилган, маълумоти — тугалланмаган олий)га Жиноят кодексининг 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисми “г” банди билан Жиноят кодексининг 57-моддаси (енгилроқ жазо тайинлаш)ни қўллаб, 3 йил муддатга озодликдан маҳрум қилиш жазоси тайинланди.

Қайд этилишича, суднинг ҳукми қонуний кучга кирмаган бўлиб, тарафлар унинг устидан қонунчиликда белгиланган тартибга мувофиқ юқори турувчи судга апелляция шикояти беришга ёки протест келтиришга ҳақли.