UzAuto Motors Chevrolet Onix ва Tracker автомобиллари сотувини тўхтатгани хабар қилинганди. Компания вакили “Дарё” мухбири билан суҳбатда мазкур автомашиналар учун шартномалар қачон тикланишини маълум қилди.
Таъкидланишича, Onix ва Tracker сотиб олиш учун шартноманинг тўхтатилишига ушбу моделларнинг жиҳозларини янгилаш билан боғлиқ масала сабаб бўлган.
“Ўтган йилнинг август ойида хабар қилинганидек, Tracker ва Onix қўшимча вариантлар билан сотувга чиқарилади. Янги вариантларда иситиладиган ташқи нометалл, олд ўриндиқлар, тозалаш зонаси, иккинчи қатор ўриндиқлари, рул, олти томонлама созланиши ҳайдовчи ўриндиғи, картер ҳимояси, Redline пакети бўлади. Шартномалар келаси ҳафта қайта тикланиши кутилмоқда. Ҳозир янги конфигурациялар бўйича шартномалар очилишига тайёргарлик кўряпмиз”, – дея маълум қилди компания вакили.
Қўшимча қилинишича, янги вариантдаги автомобиллар нархлари аввалгисидан фарқ қилади. Душанба куни 8 май куни нархлар эълон қилиниши кутилмоқда.
“Ўзавтосавдо” боти маълумотларига кўра, апрель ойи охирида Tracker’ни харид қилиш учун навбат 17,7 минг кишидан ошган. Onix етказиб бериш 13,7 минг харидорни кутаётганди.
Аввалроқ Cobalt ва Lacetti сотиб олиш бўйича шартномалар тузиш тўхтаганидан олти ой ўтиб, нархи 200 миллион сўмдан юқори бўлган Onix ва Tracker’га шартнома бериш ҳам тўхтагани хабар қилинганди. Ҳозирда компаниядан сотиб олиш мумкин бўлган энг арзон автомобиль — 420 миллион сўмлик Malibu бўлиб қолмоқда.
“Одатда шартномалар чиқаришни тугатиш инвентаризация ва кейинчалик нархларнинг ошиши вақтида содир бўлади. Охирги 5 йил ичида UzAuto Motors турли баҳоналар билан нархларни оширишдан аввал автомобиллар савдосини тўхтатган”, — дея ҳолатга муносабат билдирган “Autostrada.uz” нашри.