Тошкентда 5 май кунидан бошлаб, 5, 11, 18, 19, 37, 44, 67, 77, 83, 136, 139, 142, 72 ва 81-сонли пойтахт бўйлаб ҳаракатланувчи автобус йўналишларида хизмат кўрсатиш янги турдаги брутто-шартнома асосида ташкил этилмоқда. Бу ҳақда пойтахт транспорт ва йўл-транспорт инфратузилмасини ривожлантириш бош бошқармаси маълум қилди.
![](/static/2023/04/Fozilbek/photo_2021-10-29_12-11-15.jpg)
Қайд этилишича, мазкур шартномалар Ўзбекистон президентининг 2023 йил 16 февралдаги “Жамоат транспорти тизимини ислоҳ қилиш чора-тадбирлари тўғрисида”ги қарорига асосан амалга оширилган.
Брутто-шартномалар — бу йўловчи ташишни ташкил этиш модели бўлиб, унда барча тушумлар шаҳар бюджетининг махсус ҳисоб рақамига ўтказилади ва шаҳар маъмурияти йўловчи ташувчига йўналишлар бўйича тўловларни бажарилган иш ҳажмидан келиб чиқиб, сифат назорати остида ўтказиб беради.
Қулай тарифлар
Мазкур қарор билан жамоат транспортидан фойдаланишда йўловчилар учун қулай тарифларни жорий этиш белгиланган. Гап бир соат ичида бир йўналишли йўловчи транспортидан бошқасига ўтиш сонидан келиб чиққан ҳолда имтиёзли ва бепул тарифлар қўлланилиши ҳақида кетмоқда.
Бундан ташқари, йўналишли йўловчи транспортидан фойдаланишда, унинг туридан қатъи назар, кунлик, бир, уч ва олти ойлик, йиллик чекланган ва чекланмаган тариф режалари жорий этилиши кутилмоқда. Йўналишларда йўлкира ҳақини тўлашда электрон тўлов тизимидан фойдаланишни рағбатлантирувчи тарифлар белгиланади.
Транспорт бошқармаси маълумотларига кўра, қулай тарифлар май охиридан ишга туширилади. Жамоат транспорт воситаларида қатнаш учун йўлкиранинг бир марталик нархи 2000 сўм, банк ва транспорт карталари, мобил иловалар орқали тўлов қилувчи йўловчилар учун эса 1600 сўмга ўзгаради.
Бир соат давомида икки автобусдан фойдаланилса, биринчисидан 1600 сўм, иккинчисидан эса 400 сўм ечиб олинади. Метродан автобусга ёки автобусдан метрога ўтилганида биринчисидан 1600 сўм, кейингисидан 1000 сўм тўлов олинади.
“Автобус—метро—автобус—автобус” ёки “метро—автобус—автобус—автобус” бўйича ҳаракатланилганида тўлов қуйидагича бўлади: 1600 + 1000 + 400 + 0 сўм, “автобус—автобус—метро—автобус” — 1600 + 400 + 1000 + 0 сўм.
Метродан бошқа турдаги транспорт воситасига ўтилса ва бир соат ичида яна метрога қайтилса, тўлиқ тариф — 1600 сўм тўланади.
Изоҳ (0)