Суперлига. “Олимпик” сафарда ғалаба қозонди, Андижонда томонлар дурангга имзо чекди

Футбол бўйича Ўзбекистон Суперлигасининг 8-туридан ўрин олган икки ўйин 18 май, шанба куни бўлиб ўтди.

“Қизилқум” “Олимпик” жамоасини қабул қилди. Учрашувнинг 13-дақиқасида Файзуллобек Жуманқўзиев ҳисобни очди. Биринчи бўлим сўнгигача ушбу натижа сақланиб қолди. 

Иккинчи бўлимни Тимур Кападзе шогирдлари ҳужумкор руҳда бошлади. 53-дақиқада Аҳмадулло Муқумжонов ҳисобни тенглаштирди. 3 дақиқа ўтиб Отабек Жўрақўзиев ҳисобни 1:2 кўринишга олиб келди. “Олимпик” клуби аъзоси Алишер Одилов 69-дақиқада тўп киритди. 

Бош ҳакам 83-дақиқада “Олимпик” дарвозасига пенальти белгилади. Гиорги Кухианидзе нуқтада адашмади ва ҳисоб — 2:3. Учрашувнинг сўнгги дақиқаларида “Олимпик” яна бир гол киритди ва Тошкентга 3 очко билан қайтадиган бўлди. Якуний ҳисоб — 2:4.

“Металлург” клуби водийнинг “Андижон” клуби меҳмони бўлди. Учрашувнинг 68-дақиқасида меҳмонлар вакили Далер Шарипов ҳисобни очди. Владимр Бубаня 76-дақиқада “Андижон” клубига бир очко келтирган гол муаллифига айланди. Шу тариқа томонлар учрашувда муроса йўлини танлади. 

Ушбу дурангдан сўнг “Андижон” клуби очколар сонини 13 тага етказиб олди ва Суперлигада пешқадамликни сақлаб турибди.

Суперлиганинг 8-туридан ўрин олган бошқа ўйинлар 19—20 май кунлари бўлиб ўтади.