14 май куни “Дарё”да “Ойликсиз қолаётган ўйинчилар, таъмири тугамаётган майдон — ўз ҳолига ташлаб қўйилган ‘Динамo’ ” сарлавҳали мақола эълон қилинди. Унда журналист клубнинг молиявий аҳволи ва клубни қийнаётган муаммолар юзасидан Вадим Абрамов фикрлари билан қизиққан эди.
Клуб матбуот бўлимининг расмий муносабатига кўра, бугун, 15 май санасидан футболчиларга ойлик маош тўланаётгани билдирилган. Жамоани қийнаётган бошқа муаммолар ҳам ҳал қилинаётгани маълум қилинди.
Жамоа олдидаги муаммолар раҳбарият томонидан бирин-кетин ҳал қилинмоқда. “Динамо” ПФК жамоасида бугундан ойлик маошлар бериляпти.
Шунингдек, “Динамо” марказий ўйингоҳини Суперлига ва халқаро учрашувларни ўтказишга тайёрлаш мақсадида “Насаф Мегастрой” МЧЖ томонидан ишлар амалга оширилмоқда, дея қўшимча қилган матбуот хизмати котиби.
Футбол майдонига дренаж тизимини ўрнатиш, суғориш тизимини модернизация қилиш ҳамда ёритиш тизимини кучайтириш ва чим қопламасини ётқизиш ишлари бажарилган. Айни вақтда стадионнинг югуриш йўлакларига асфалт ётқизиш ишлари ҳам амалга оширилиб, ишлар якунланиш арафасида.
Самарқанд шаҳридаги “Афросиёб Арена” стадионини ҳам стандарт ҳолатга келтириш борасида мутасаддилар томонидан тегишли ишлар бошлангани ҳақида ҳам матбуот хизмати хабарида маълумот берилган.
Эслатиб ўтамиз:
- “Динамо” клуби бош мураббийи Вадим Абрамов футболчилар салкам 4 ойдан буён маош олмаётганини айтиб ўтганди.
- “Динамо” клуби 20 май куни “Пахтакор” клубини қабул қилади.
- Ижтимоий тармоқларда ушбу ўйин Самарқандда бўлиши ҳақида хабарлар тарқалмоқда.
- ПФЛ бу ҳақда расман ҳеч қандай маълумот берганича йўқ.
Изоҳ (0)